مقـتـطـفـــــــــــــــــــــات !!! ( من قديمي )

[خليل الشبرمي]

.

بديت بسم الله اللي لادعته الناس لبى واجاب = ربٍ عطوفٍ يشوف ظروفها ويروف بحوالها
أوي الله الله وسيع المغرفه .. والله شديد العقاب = سبحانه مقسّم ارزاق البشر ومقدّر آجالها

...

[خليل الشبرمي]

بديت بسم الله اللي لادعته الناس لبى واجاب = ربٍ عطوفٍ يشوف ظروفها ويروف بحوالها
أوي الله الله وسيع المغفره .. والله شديد العقاب = سبحانه مقسّم ارزاق البشر ومقدّر آجالها

...[/QUOTE]

[خليل الشبرمي]

رجواي باللي عليه المتكل والاعتمادي = وماخاب عبد(ن) على رب المخاليق اعتماده
رحيم يحيي هشيم القاع من وبل الغوادي = وحكيم فيما حكم واراد له حكمه واراده
سبحانه اللي رفع سبع السموات الشدادي = اللي دحر بالبحر فرعون وجنوده واباده

[خليل الشبرمي]

.

من الوسمي سحاب(ن) ساقه الرحمن ومفاجات = تزبّر وارتهش وارهش وهل وبيّح سدوده
ترزم وارتكم وابهل على الروضه ونوّه بات = يقود ونوض براقه يقيد وترجس رعوده
ردوم(ن) هل ماها من سماها والبرد زخات = وغثير السيل من يوحي هديره زادت سعوده
ربابه لاانفهق واقفى مثل ذود(ن) من الخلفات = تتالى واقفت ركابه عقب مانزّل شنوده
كساه العشب والنوار الاصفر كنه جنيهات = وقال الروض غني يا ام سالم باعذب انشوده
يطيب الكيف والدله على جمر الغضا مركات = بروض(ن) لااومت فنوده يفوح الطيب مع نوده

[خليل الشبرمي]

.

ويلك من الله تماديت يا اسمر يا نحيل = وش جرى لي من سبايبك من شهر اثنعش
ذا وحبك ساكن(ن) في معاليقي نزيل = معشش(ن) بالقلب من يوم عمرك بالطعش
حالف(ن) ما انسى ولا اسلى غرامك يا جميل = لين اودّع دنيتي ميت(ن) فوق النعش

[خليل الشبرمي]

.

يازين انا من ثمان سنين = مجنون يازين بعيونك
والشاهد الله الى ذا الحين = لازلت لليوم مجنونك
خفّف على قلبي المسكين = وارفق على قلب مظنونك
ماهو بحبحب على السكين = اطعن ولكن على هونك

[خليل الشبرمي]

.

اكتبوا له يا حمد لفت انتباه = يدرك اللي من سهم طرفه عليل
وكان حبي فيه لبس(ن) واشتباه = دوك مهج القلب برهان ودليل

[خليل الشبرمي]

.

البوم ينزل بالخرابه والقليب = وطيور شلوى عالي(ن) منزالها
والحق حق ودوم شمسه ماتغيب = والمخزيه خزي(ن) على عمّالها
لاتامن الدنيا تطيب ولا تطيب = ما تنومن باقفاياها واقبالها

[خليل الشبرمي]

.

من زود مابي يالغضي ترخت = يوم الوعد هجري وميلادي
ومن لهفتي ياسيّدي دوخت = رزنامتي ياثالث اعيادي
لاشك ما ادري وش بلاك افخت = ياباشة الغزلان ميعادي
يا حيلة الله في رداة البخت = حظي معك بالوصل ماجادي
الله يجيبك يا غرور اليخت = الموج ماهو دايم(ن) هادي

[خليل الشبرمي]

.

يا عيوني عيوني عن خطاك معصوبه = مخلص(ن) لك بحبي والليالي عصيبه
ليه ماترحم اللي منك يمك هروبه = ومن عذابك لذيذ ما يهتني به
بعدك اقسى عذاب وقربك اعذب عذوبه = ووصلك اكبر نعيم وصدك اكبر مصيبه
وصمت اعظم عقاب وهمسك اجزل مثوبه = وانت طب الجروح المبطيه والعطيبه
سقت جيش العتب لاشك واجه صعوبه = وانسحب من ميادينك كتيبه كتيبه
تدري ان المحبه ياحبيبي عقوبه = وادري المحبه طوع ماهي غصيبه
وادري ان الدقايق والعمار محسوبه = حسبي الله على حظي وربي حسيبه