اللي رزق مادبّ فـ الخبت الوعر رزّاقي

[أخت من طاع الله]

صباحكم عود معتق ..
ورياحين..
وشكراً لمروركم مُسبقاً..

أتعب من الواقع وأضوج إليا فتحت أبوابه=وأنوح من حر(ن) تمركز في صميم أعماقي
يلفني حزن الظلام اللي فتق سردابه=وأستجمع أطرافي وهمي فـ الحنايا باقي
لا أبوك ياحظ القشر لا أبو زمان(ن) جابه=زوّد على صلف المتون بشيل مالايطاقي
تلقى المشاكل في حياتي سلعة الجلابه=هذي تخم وذي تذم وذي تحل أوثاقي
مختلفة الأذواق واللي ماعليه أطلابه=مابارت السلعة مدام أختلفت الأذواقي
عودي زمى وأنحت وأطرق وإندفن بترابه=سمحت مالي من زماني طمعتن بالباقي
يسدني مكثور خيره لافهق مخلابه=واللي رزق مادب فـ.. الخبت الوعر رزّاقي
ريح الهجير تذر ضلعي يمها وأنحابه=في جرهدي البيد حدبه صاليات اشعاقي
يموت ماضمّن ولكن مستتر بثيابه=أفضل من انه في متاهة رحلتي ينساقي
يمكن تفاخت به بشي(ن) ماحسبت أحسابه=وأتضيع من كثر التجهم هقوة اللي هاقي
قلبي لك الله يازماني موجرن مشرابه=ضرمان واللي فوحها ما رب مثل الساقي
لا لجّ رجم الجوف من لجّت فياض شعابه=كنه غريب(ن) مرتحل ضاقت به الأفاقي
في مهمهة ليل(ن) بهيم(ن) يصعب المسرى به=كب الخطام وقام يبراله من الخفاقي
شوق(ن) على هدّ القصيد وفيض رعش أهدابه=لاياقصيد(ن) لانخيته همّ بالمطلاقي
عادتك راس الطلع لا أعسر بالسهل ترقابه=مقباس مثل البرق فرق الطرق زاك أعراقي
وقت الهداد تصير وقف الساق راس أعصابه=عفواً غلطت أقصد عصابة راس وقفة ساقي..!!
نقدح بك ولاعندنا فـ.. اللي يغز بنابه=منته بمسقي أو عليك الدرهمان تساقي
عقبان ماتحسب لذرّ ولا لشرك ذبابه=لا أعطيت دربك يبترم كل أرقط(ن) زرّاقي
عذب الشهاليل القراح من الودق صبابه=مروي معاطيش الكبود بنبعك الرقراقي
لو غاب غيرك ماحسبت لجيته وغيابه=لانك هواي وبيننا عهد الشرف ميثاقي
ومدام هـ الواقع يتعبني بصك أبوابه=ويكفيني إنه لافنى بيضل قصيدي باقي

..
.. أخت من طاع الله ..