من سبة غيابك شكيت القريات وخيم عليها الحزن وأصبح لها بيت

[احمدعايض الشراري]

كيبورديه إهداء لقلوبكم
/


قصرت في حقك وفي حقك أخطيت
.....................ولك العذر مني على كل مافات

أدري بأني يابعدهم تماديت
..................مير البلا ببليس حي (ن) ولامات

ماتشفع الغلطه ولو قلت ياليت
...................حتى الندم فيني رسم له علامات

في غيبتك للحزن والهم خاويت
.......................ماكنهم إلا من الروح والذات

أيه أعترف بالذنب منه توذيت
....................وقلبي يعاتبني وأنا أقول هيهات

هذي ترا كفي مع العذر مديت
....................تنزف ندم هالحين وبكل الأوقات

كن الثواني واقفه ويش سويت
...................لحظة غضب مني ولكن ترا جات

أدفع ثمنها كل ماأصبحت وأمسيت
....................وطبع البشر دايم تجي منه زلات

ضاق الفضا بالبعد واليوم عانيت
........................ولاغلاتك في خفوقي بنايات

ماتنهدم مادمت حي(ن) واناميت
.....................من سبة غيابك شكيت القريات

الديره الي في رباها تربيت
...................حتى شوارعها كسى الخد دمعات

ماهو سراب(ن) المحه يوم مريت
....................وقت الغياب وقبل عزفي للأبيات

خيم عليها الحزن وأصبح لها بيت
...............وثوب الفرح عندك وأنا أقول لك هات

حديت لك عمري إلى قلت حديت
..................وعربنت لك من داخل الصدر ونات

عيني على الجوال بالصوت ونيت
.........................اقلب الوارد رسايل قديمات

وأقول في قلبي من البعد مليت
....................ويارب لايفرح عذول{ن}وشمات

وتقول سامحتك ومن قلبي أعفيت
...................وتبقى معي مهما تطول المسافات