،،وتـــرحـل،،

[عبدالله العويمر]

وترحل تحسبني لارحلت اقدر على النسيان ! = وانا اللي لاطرا طاري رحيلك ضعت بشتاتي
دخيلك ،،بسألك لارحت منهو فيننا الخسران = أنا والاّ انت ؟،،جاوب قبل ماتكتب بي آهاتي
أنا اللي من عرفتك والسما قوس ، وغلاك الـوان = وأرضي تعزف اهزوجة فرح لاجتْك خطواتي
وصوتك غيمة ٍ أحيت جفافي ، والوصل هتّان = وحزن عمري يموت بضحكتك ياكل بسماتي
تعرف انك غلاي وراحتي ، وان التعب لابان = يموت ان جيتلك ياللي هواك اجمل حكاياتي
وتعرف اني على بساط انتظاري أجمع الأحزان =واكبّلها اذا وصلك اخذني من متاهاتي
انا من قبل اعرفك مالقيت لهالعمر عنوان = سوى : حزن وأمل ضايع ،ويأسي هو مداراتي
أنا من قبل اعرفك كنت اقول ان الغلا حقران = واقول ان الهوى كذبه ،،قناعاتي كما الآتي :
قليل اللي صدق ،،واللي يخون بهالزمن كسبان = كثير اللي يمرون ،،وقِناعاتي قناعاتي
وجيت انت وعرفت اني بحكمي كنت انا الغلطان = وصرت انت القناعات ،،وحنيني إتجاهاتي
دخيلك ،،مابقى فيني شعور ٍ يحتمل خذلان =دخيلك لاتخليني أسير ليأس راياتي
أنا مدري عن اللي لي تشيل بداخل الوجدان =شعور بحب ،أو رغبة تشمّت بانكساراتي
وكل اللي ابي تعرف: انا مااقدر على النسيان = لأني جيت لك كلي ،،وصعب آعيش بشتاتي