مالوم حرفي

[غريبة دار]

حاولت اجاري بالشعر من هواني =الشاعر اللي صب زمزم قوافيه
الشاعر اللي لا دنا الليل جاني=بالحان قلبه..كيف قلبي يجازيه؟!.
جيته حبيبي لجل ارد الثواني= واشعل فوانيس الهوى في موانيه
فاحت حروفي من جدايل زماني= وزفرة ونين الشوق تسبق ثوانيه
لا شفت عينه شفت نور المعاني= واولّع أجفان القوافي بطاريه
ما لوم حرفي دام شخصه لفاني=واغصان شعري ازهرت وسط واديه
لا هان رآس ٍ بالمحبة عطاني=لا شفت غيره قلت محد ٍ يساويه.
بسقيه من كاسي وارويه أماني=واشرّبه صافي حناني و اداريه
اليا لفاني طيف الاحباب ..جاني=كل المشاعر في خفوقي تناديه
الشوق يرضف ونة ٍ من كياني=شوقي يهوجس به.. سكوتي يحاكيه
بين الحنايا خيل يرمح خذاني=والأرض فايح شوقها من مواطيه
شرّقت ليلي يوم همي بلاني=على دروب الحبّ و اتبع حراويه
اضوي شموعي في دروب المحاني = شوقه يناجيني و شوقي يناجيه
ضميت دربه لين جرحه كواني=ارخي جفوني للقا بين اياديه
الفرح خانه.. دام قلبه يعاني=جرحه تسلل في خفوقي واداويه
الحظ مايل.. والقدر له رماني =يكسر غصون الحظ بالحيل يلويه
دام الثواني حب!! فالعمر فاني=خوفي يجيني الموت محد ٍ يراعيه
ان كنت حي ٍ له غرام و حناني=وان مت له مني قصايد توصيه
هذي وصيتي يا حبيبي:عشاني=لا تنفى حبي من حياتك و تطويه