الفـول برياليـن والخبـز بريـال

[خليف الوهيداني]

كريم يابـرقٍ سـرىا الليـل كلّـه=ليله ظلام وبارقه يشعـل اشعـال
ومزنه مرودم والهواء راكـدٍ لّـه=والما منه ينزل على الارض شـلال
سبحان من أنشاه فـي قـدرةٍ لّـه=وبمره يسوق ويتجّه ويـن ماقـال
كونه بخار ووسطـه المـا يشلّـه=ومن البحر ساقه لوديـان وجبـال
ويسقي به ارضٍ الدهر جاريٍ لّـه=يحيي شجرها عقب موته والا محال
يرعد ويبرق والهواء سايـقٍ لّـه=بامر الولي عالم خفيـات الاحـوال
ربٍ عـنـه ماخافـيـاً شــئ لله=يعلم خفايا الخلق صـادق ودجّـال
والارض ملكه والسما تحـت ظلّـه=وهو الذي عند المهمـات ينسـال
ومن بعد ذكر اللي فرض قبلةٍ لّـه=سر ياقلم واكتب جديـدات الامثـال
اكتب وعبّر والخطـا عنـك زلّـه=في خط واضح واعدل الحرف لامال
اكتب وحبـرك دمـع عيـنٍ تهلّـه=ادموع عينٍ من عنا الوقت همّـال
اكتب كلام اللي نزح عـن محلّـه=بينه وبينه الـف كيلـو بالاميـال
الياطرالـه قـام هـمّـه يتـلّـه=قامت هواجيسه تحدّه على الجـال
والرجل يعرف كيـف دربـه يدلّـه=ولا غدا مع قـول عـاذل وعـذّال
لا تعيش في عيشة إهانـه وذلّـه=لوانت تسكن في خلا مابـه ازوال
ودربٍ تشوف به المماشي مخلّـه=جنّب عنه والدرب الا قشر للا نذال
وفل الحجاج مْـع الرجاجيـل فلّـه=اليا احترمت الناس عـدّوك رجّـال
والنـاس تتبـع واحـدٍ ماتمـلّـه=ومن عال يمّه عالو الناس لاعـال
لو أن بعض الناس بلشـه وعلّـه=حاول عنه تبعد بلا هـرج وجـدال
لا تجادله تبلـش معـه باالجدلّـه=وينشر علومك ناقل القيل والقـال
والا اليـا منّـك تكلـمّـت قـلّـه=قولٍ يخلّي وجهه الـوان واشكـال
حتى يحسـب عقبهـا كلمـةٍ لّـه=بعض السوالف مالها ساس واهبال
والرجل يعرف من طرف هرجةٍ لّـه=هرجه يبيّن ماطراله علـى البـال
وحذرا الردي حذرا تخاويـه خلّـه=لوهو رقا لْمنصب ولوهو ملك مال
انتـه خويّـه لابـدت حاجـةٍ لّـه=واليا بدالك حاجـةٍ فيـه ماسـال
ولوطاب مـدّه عـوّد لعـادةٍ لّـه=ماله مع اهل الطيب حضٍ ولافـال
اسـأل مْجـرّب والتجـارب مدلّـه=التجربـه درسٍ مثبّـت وفـعّـال
خاويت ناسٍ من جميـع الشّكلّـه=وفي ماخلق ربـي تفكّـر وتهتـال
احدٍ خـلاف الربـع دايـم يحلّـه=واليا حضر ينحل بالحال الاشكـال
واليا فزع يعجبك فـي فزعـةٍ لّـه=وطيبه مع الاجناب والربع باالحـال
وايضا تنومس للخوي خـوّةٍ لّـه=طيب وله باالطيب مخرج ومدخـال
واحـدٍ ردي وفاشلـه سمعـةٍ لّـه=وشرّه على الاقراب والعم والخـال
واحدٍ تعجّب منه فـي هيبـةٍ لّـه=ولاقال يفعـل مايتـردّد اليـا قـال
وتشوف فرق اخوٍ واخو باالجبلّـه=باالطيب والمذهب وهم نسل رجّـال
واللي تشوفه خـاربٍ مذهـبٍ لّـه=ابعد عنه جعلـه لمليـون سـلال
ماانته ابمجبورٍ علـى قربـةٍ لّـه=لو انتّـه تخـاوي هنـودٍ ونيبـال
وزل الخطا عن صاحب الطيب زلّه=وخويّك ادمح زلّته وانـس ماقـال
يمكن تجي كلمه مهي مقصـدٍ لّـه=احذر يجيك مْن الخطا شك وجفـال
الرجل ماله باالعمـر مكسـبٍ لّـه=والله لا قالوا رجل طيـب واعمـال
ياجامـعٍ للمـال ومـخـزنٍ لّــه=وش يستفيد الرجل من جمعت المال
ان ماوقف به لا بـدت عـازةٍ لّـه=لامات من ماله ما غير الكفن شال
ماالله خلف في هاالحياة اتعبٍ لّـه=والمال بالي والعمر باالمثـل بـال
واللي يفكر بس فـي عيشـةٍ لّـه=الفـول برياليـن والخبـز بريـال

[سكون]

صح لسانك

وطاب مقالك



تقديري لك


اختك


سكووون

[خليل المطيري]

بسم الله الرحمن الرحيم

خليف الوهيداني

السلام عليكم ورحمة الله وبركاته


صح الله لسانك وعلا شانك
ابدعت وأمتعت فلله درك من شارع



تقبل الود والتقدير


اخوك
خليل المطيري

[خليل المطيري]

بسم الله الرحمن الرحيم

خليف الوهيداني

السلام عليكم ورحمة الله وبركاته


عودة مرة أخرى لهذه القصيده الرنااااااااااانه
وهذه القصيده التي جمعت الجمال مع الحكمه مع التجربه
فقد قرأتها مرتين وسأعود لقراءتها مرات ومرات


ما اجمل ما خطه قلمك
وما اجمل ما فاض به فكرك
وما اروع هذا النقش الذي يرسم لنا
حياتنا اليوميه بأحوالها وما فيـــــــــها
من امور قد تحدث للإنسان في أيامه وشهوره


بيض الله وجهك اخي الغالي
والله يعطيك الصحه والعااااااااااااااافيه

والمعذره لم استطع التعبير الكافي والوافي
فهذه القصيده وزنها ذهب وشاعرها لا يباع بالذهب

سجل احترامي وأعجاااااااااااااابي




اخوك
حسام الشعر

[عبدالرحمن القاضي]

خلف الوهيداني
صح لسانك
لاهنت
دمت بخير

[أحمد الجعيد]

.
.

الباهي /
خليف الوهيداني

قصيدة..تكتب بماء الورد

صح قلبك / كلك

.
.

ودمت بحب...//

[فهد الدباسي]

خليف الوهيداني


نصٌ رائع و جميل



سـ أعود لك يا مبدع

[خالد بن علي]

كبير كعاتك

نص به الكثير والكثير

من الحضور الراقي والشعر الساطع

بين معالم الحكمه والأمثال

كم أنت فاضل ونبيل في طرحك

دمت سيدي بكل ود

[غريبة دار]

أخي خليف الوهيداني

صح لسانك و سلم بنانك

قصيدة ولا اروع من شاعر رائع

تحياتي لك

اختك غريبة دار

[عبدالناصرالعالي]

الغالي خلف


الصمت في حرم الجمال جمال


صح الساانك


دمت بالف خير

بالتوفيق