الشاعر الشيخ محمد بن راشد بن مهنا النعيمي

[عبدالله النعيمي]

محمد بن راشد يسند على اخيه عرار بن عمير النعيمي والد الشاعر شبيب بن عرار الرمزاني

يا عرار يا بن عمير يامكرم الضيف= للحق والانصاف هاك اعترافي
اشهد شهاده لا مخافة ولا زيف=ان كثر مثلك ما علينا خلافي
يا بعد شبحك من اشبوح المقاصيف= قصار النظر واهل النفوس الضعافي
ويا بو عمير البارحة دك بي طيف= طيف سرى بي يم ذيك الفيافي
يم الوطن يم الاهل والمعاريف=ربعن لخطار المنارة ملافي
فخري وهم ذخري الا مسنى حيف=ربعي بني عمي مناجد أكتافي
رجالن تعد أفعالهم بالمواقيف=من عصر لول والسنين العجافي
امجادهم ما تنحصي بالتواصيف= ورجالهم في سلم الاجواد وافي
ويا بوعمير ان سلت عن حالتي كيف= إللي بحالي من عنا الوقت كافي
حالي كما حال أسعرن حاله صخيف=عوقه خطير ومال عوقه مشافي
قلبي يحب البر ما حب انا السيف=ومن المسلح صاب قلبي شعافي
احب روض ينبت السدر والريف= احب ذا يا عرار بين و خافي
واحب ونات القلوب المواليف=واحب صوت الورق والجو صافي
احب ذا واحب روس المشاريف=واحب من في باطن الارض غافي
أحبه وابيه وحال دونه صواديف=ومني خذاه الموت ما راح جافي
جعل الحيا يا عرار في الوسم والصيف=يسقي مرابيع وطاها الجفافي
منازل كانت لها ماضي شيف= واليوم هي رسم ذرته السوافي
مداهيل غزلان ترب الطفا طيف=غدران ريضان الرياض النظافي
سود العيون مضمرات السراجيف=قد عانسن برد الشتا والهيافي
بنات بدو يبكلن المشانيف= والخرج والساحة جواد السنافي
وخوات من يوم الوغى يروى السيف= لعيون من قرنه على المتن ظافي
وبنات من يثنى خلاف المواجيف= حامي عقاب الحاينات الحوافي
مشروبهن من در صهبن مشاعيف=در العطوف اللي من الديد دافي
ما صنفوا نوعه هل السوق تصنيف = وما حط رسمه في المجلة صحافي
وماكولهن حمل العياد المهاديف=شقر العذوق اللي قموعه صخافي
ماريته لو تتركه كشف ماحيف=قرى الطروش المنتوين الخفافي