الشاعر الشيخ محمد بن راشد بن مهنا النعيمي

[عبدالله النعيمي]

والله لو باطيع قلبي وبرضيه=لا لا حي السرحان واعول عويله
واعدى المرقاب وارقا ابعاليه=واهيض اللي ما وطا الحزن ليله
واذكر المجروح ما كان ناسيه=جرح على غاليه ولا خليله
واجيب دمع جرح الخد جاريه=قد له ليالي مايوني هميله
بين الرجا والياس طالت لياليه=ومن بات مقطوع الرجا عزتي له
يا عين هاتي غالي الدمع هاتيه=هاتي غزير الدمع واسخي هجيله
كل على غالي يبيح بخافيه =لو كان ماله في المقادير حيله
لو كان كثر النوح ما هو بمحيه= النوح للمجروح يشفي غليله
يا عين وين اللي عليه المشاريه=اللي بفيه للمسير ظليله
بيت رفيع شامخات مبانيه=وخطار من شتى النحايا تجي له
مجالسه تزها من الزل غاليه=زهو الربيع ابنبت خطوى مسيلة
وراعيه من فوق الحراوي هقاوية=زبون حيد ثقل العسر ميله
وكم خير من طالب الدين يذريه= بالحوش من عقر البعيد ايعني له
واليا نصاه بغالي المال يفديه= وبالحال لاكبرت عليه العضيلة
غربت منه ناوي بارجع اتيه=واليا دعاني داعيه بنثني له
وعودت جيته وارفع الصوت وادعيه=وما شفت له من ساكن الحي زيلة
ابو مهنا ريف جاره وعانيه= ياقل من في الناس ياتي مثيله
ووكاد في اصله رجال تساويه= ويا شوفت الله وين راشد وجيله
دوجت في ديرانهم دوجة التيه=وعزي لمن تاهت روابع دليله
ياولله اللي فارق الحي من فيه=فرقا بها ما عاد تنفع وسيلة
وعزى لمثلي بيح الوجد خافيه=وجد على نجع تقافا رحيله
علمي بهم حي وساع نواحيه=اعيال عم كلهم من قبيلة
هذا ولد عمه وهذا ابنا اخيه=وهذا خوي في العرب ينتمي له
ربعه وهم بده ومن هم مباديه=خطلان الايدي في السنين المحيله
حق علينا سلمهم ما نخليه=وحنا باثرهم لو خطاهم طويله
وجدي عليهم وجد من مات غاليه=عقبه لذيذ النوم عيا يجي له
يدله شوي وباقي الوقت تبكيه=ذكراه بأيام مضت له جميله
يذكر امود له قريب مصافيه=امه وابوه الي صغير يشيله
او وجد من طالت ليالي مساريه=وامسى على صغو مشاش ثميله
في كنة المرزم حيام ضواميه=ذود مجاهيم خطاها ثقيلة
وده بورد العد والعد حاميه=حماية المظهور يوم الوهيلة
او وجد تفاق غدر به معاديه=خذوه بالغرات غدرن ادغيلة
جاله من الساقه غريم محافيه=ولزه بمفتوقن جروحه قتيله
غروه خوان العهد واسرقوا فيه= ويا ويل من رب البرايا كفيله
او وجد زراعن وطا السيل واديه= سيل عقب سيل حقوق مخيله
سيل جرف من عاتي الزرع عاصيه= شله ودمر ما غرس من فسيلة
وامسى يفكر بين حاضر وماضيه=واصبح يدور للوهد من يعيله
عليك ياشلال خلي ورافيه=يا بوي يا يمناي وين اغدى له
تركني على الدنيا وحيدن وأحاتيه=واسرار غاياته علي مستحيلة
عديت انا منه ومني معديه=القبر ليت القبر يأخذ بديله
وليته يشاكيني بهمه واشاكيه=وينهي ويامرني على ما يبي له
واطيع طاعة خادم البيت واليه=واجعل له النفس العزيزه ذليلة
ويالله ياللي له نصلي ونرجيه=يا عالم باسرار من يشتكي له
يا من عليه الرزق والكون بيديه=يا با العنايا والعطايا الجزيلة
ودعتك اللي في جوارك مخليه=بحماك يا حامي الوفا والفضيله
ارحم عزيز بالمعزه امضريه=ولولاك مالحق القرايب بنيله