===نبض===

[عبدالرحمن القاضي]

سرى ليل الهوى واقبل صباحه=ونورالشمس اشرق في فؤادي
غزير شعاعها ضمد جراحه=وحسيت الدفا عقب البرادي
حلاها كاسبٍ كل الملاحه=وماتحت الحواجب غير عادي
صحيح ان الهوى مافيه راحه=وقلب معذبه طير الهدادي
تراك اشقيتني خذها صراحه=وتراي ازريت اراعيلك وانادي
تركت النوم عقبك في مراحه=وعفت الناس والدنيا وزادي

[عبدالرحمن القاضي]

غنت احزاني عذابات الشجون=يوم محبوبي تناساني اكيد
ماقدرت اصبرعلى هجرالفتون=والسوالف كنها نشوان عيد
مقدراتناسى سحرذيك العيون=في معاليقي براكينٍ تقيد
ويش اسوي في عذابه والظنون=والاماني مالها يومٍ سعيد
صارت الدنيا مثل حال السكون=في حياتي شفت انا فرحٍ بعيد
قصة الفرقا غدت اعذب طعون=قصتي قصة ومأساتي تزيد
صارت ايامي كمايبس الغصون=هقوتي ماعاد انا صبري يفيد

[عبدالرحمن القاضي]

جيت مثل الطير مكسور الجناح=للهوى في داخلي جرحٍ سطابي
آه واويلاه من هجر الملاح=حد شوقي واصلٍ حد السحابي
في عيوني صغرت الأرض البراح=من همومي وانتظاري واغترابي
نيتي بيدين نيّات الرياح=وين ماهب الهوى شوقي سرى بي
تهت واتعبت الفضا حزن وجراح=لين ضيّق خاطره هاجس عذابي
تهت مابين الحقيقة والمزاح=مع حبيبٍ فالمحبة مادرى بي

[عبدالرحمن القاضي]

يامنوتي ياغايتي ياهوى البال=بالله قلي كيف لحظة اصافيك
كلك غريب الطبع والحب والحال=ماكنت مره واضحٍ ليه وش فيك
صمتك بحرحيرة ونظراتك جدال=ومركب غرامي غارقٍ في شواطيك
صوتك مزونٍ تمطر جروحٍ ثقال=ماتروي الظامي ولو كان مغليك
وقتك سحابة صيف وجنون ترحال=واحلامك آمالٍ تسابق خطاويك
تغيب شمسك بس يبقى له ظلال=والياس اخاف انه مع الوقت يطويك

[عبدالرحمن القاضي]

وعد حالي شكا من كثر ضيمه وويله=يازلالٍ قراحه شح في منبعه
مارواني الغرام العذب من سلسبيله=ماروى العاشق المغرم سوى مدمعه
مابقى في سما العشاق برقٍ نخيله=غير برقٍ جراهيد الضما مرتعه
لوغديتي بليل الشوق نجمة سهيله=طالب الما نجوم الليل ماتنفعه
ويش عذرك بقلبي جاوبي يابخيله=ويش ذنب الوفا في مولده نصرعه
طايح الحظ مثلي مابقى له وسيله=يفتل الياس بيده والرجا يقطعه