قصيدتي في رثاء عمي رحمه الله تعالى ..

[عناوين الدمـوع]

ياحزوني ويش جابك وانا كلي حزون
..................... مافهقتي جيتـّك ثم جيتي في سعه

ياحزوني ماقضاه الله وراده يكون
..................... وماحد ٍ بيعيش طول العمر دوم بدعه

ياعيوني بس تكفين روفي بالجفون
..................... فاض دمعي لين دمعي نضب من مدمعه

ياكبر حزني على فقدك وكبر الطعون
..................... كن قلبي حوّط من الجهات الاربعه

واشهروا عدواني رماحهم حقد وضغون
..................... واغرزوها لين لاقي خفوقي مصرعه

ياصبر قلبي ياعمي وياصبر العيون
..................... وياصبر جرح ٍ من سنين هذا موضعه

رحت ياوجه النشاما ويالقلب الحنون
..................... ومابقى من عقبك الا الهموم المفجعه

رحت ماحامت حواليك شبهات وظنون
..................... يوم غيرك من هل الريب ذنبه يتبعه

سيرتك عود ازرق وريحها طيب ودخون
..................... وفي حياتك صادق ٍ مالبست الاقنعه

موتتك هدت عظامي وحيلي والمتون
..................... وماحد ٍ جاله خبر موتك الا وافجعه

كل علم ٍ غير علم ٍ نقل موتك يهون
..................... ويقطع الله كل علم ٍ سيوفه موجعه

وكل هم ٍ غير هم ٍ عقب فقدك يمون
..................... يوم هم فراقك اسرف وصوّب مدفعه

والله انك ماعرفت الملاهي والمجون
..................... ماعرفت الا الصراط السويْ تمشي معه

والله ان اللي يحبونك بصدق وجنون
..................... عالم ٍ حبك قدرت بحشاهم تطبعه

يومك اللي كنت لضعوفهم عز ٍ وعون
..................... وفزعة للي فزع بك ولو هو في السعه

والله انك للأمانات تحفظها وتصون
..................... وانت راعي حق والحق عندك مقطعه

كن موتك حلم ليل ٍ تكذبه العيون
..................... وعندي إحساس ٍ غريب ان صوتك بسمعه

جعل قبرك روضة جنان فيها كل لون
..................... من زهور ومن ورود وفياض ٍ ممتعه

جعل قبرك يا ابومرضي مراهيش المزون
..................... وجعل حظك رحمة الله وقدرك يرفعه

وياحزوني ماقضاه الله وراده يكون
..................... والقدر أمره من الله ولا احد ٍ يمنعه




////////////////////////////////////////////////////////////////////////////////////////////


قصيده جداً مؤثره أخوي قديم الشوق.... تفيض صدقاً وحرقه...

وهذا البيت أثر بي أيما تأثير...

كن موتك حلم ليل ٍ تكذبه العيون
..................... وعندي إحساس ٍ غريب ان صوتك بسمعه


ما أقسى الحزن وما ألطف النسيان...


أسأل الله لعمك الفردوس الأعلى من الجنان وألا يريكم في غالٍ مكروها أبدا...


تقبلني هنا....