ذوقك هو الأجمل .. أختر قصيدة وأعرض ما أعجبك بها من أبيات

[محمد الفرحان]

نبضـات قلبـي مثـل دق الثـوانـي=مع كـل دقّـه ينجلـي منّـي انفـاس
الصبح أعاني وايضـاً الليـل أعانـي=وارسم على شطّ الأمل (بسمة اليـاس)
اضحك ودمعي فـي عيونـي كوانـي=وابكي وانا والليل (شاعر) و(نبـراس)
الهـمّ ينقـش ضيقـتـي بالمحـانـي=والشعر يشرب من حياتي ( مية كاس )
ياخـذ ولا اذكـر بالسعـاده عطانـي=وشلون يعطي؟ وهْو حبـرٍ وقرطـاس
أعطيـه فكـر وذكريـات ومعـانـي=وآخذ عنا واعجـاب مغـرم وحسّـاس
اشقى وغيـري ينتعـش مـن حنانـي=ولا اسمع الا:" قوّ قلبـك.. ولابـاس "
لاباس عقب الياس فاسـه رمانـي؟!!=الياس من لابـاس سلّـط علـي فـاس
مركـب نجاتـي مالقـى لـه موانـي=تايـه بـلا وجهـات ديـره ولانـاس
الله واكبـر كيـف يـقـدر زمـانـي=انه يبشّر جـوف قلبـي بالإفـلاس!!
ياصاحبـي.. ياساحبـي.. يااسمرانـي=ياللي بكفّك سيف (عنتـر) (وجسّـاس)
لاصرت انا بالحـب مجنـي وجانـي=وش لي ووش للحب دامه وجع راس؟!!
لكـن غرامـك دون غيـرك بلانـي=اللي بلَى (محمد) عقب غيبة (دبـاس)
الضيم.. والدمـع الحَمَـرْ.. والهوانـي=والضيق.. وبعاد الحبايب.. والاتعـاس
المـوت ليتـه قبـل اشوفـك لقانـي=ليتي تحت رمل الثـرى مالـي قيـاس
او ليتنـي ماعشـت.. والا عسانـي:=قبلـك بليـت بعلـةٍ تقطـع الـبـاس
أحيان اشوفك فـي (سهيـل اليمانـي)=واحيان اشوفك في يدي تضرب اخماس
هوجاس والهوجـاس كـاذب وفانـي=مثلك حقيقـه دون طيـفٍ وهوجـاس
ارجـوك قلّـي لاتحـطّـم كيـانـي=ان كان غيري داخلـك دقّ الاجـراس
الحـب ماهـو فـي طـوال المبانـي=ولاهو فتيلٍ يشعلـه (عقـد الألمـاس)
ولاهـو فخـر قـدّام قاصـي ودانـي=الحب.. (دستور التفاهـم والاحسـاس)
اللي مضى وارجـوك تكفـى كفانـي=العمـر يمضـي والثوانـي والانفـاس
جيتـك أعانـي وان تركتـك أعانـي=وارسم على شطّ الامل (بسمة اليـاس)

.

.

عبدالعزيز الدهمشي

.

.