بين التغلي والجهاله

[محمد بن قطنان]

الاحبه في المنابع
مساكم الله بالخير جميعا شعراء وكتاب واعضاء ومبدعين
اتشرف بهذه المصافحه العزيزه على قلبي
واقدم لكم هذا العربون واتمنى ان يكون ساكنا بين طيات مشاعركم

يامدلع وش القصه عسى الله يديمك=في شروع الحبايب يكرهون الخفيّه
انت عارف وش اللي يستدير بصميمك؟=او عمايل مدلّع ما يحسب الخطيّه؟
كان قصدك جهاله فانت قلبك سليمك=وقلبي اللي تعذّب بين حرّه وكيه
وكان قصدك تغلّي في حشايه مقيمك=وكان قصدك سمحت.. اطلقت منّك يديّه
البلا صرت معرف فيك صدّك وهيمك=صرت اصدّق واكذّب بين ذيّه وذّيه
انا خلّك لطيف الروح والا غريمك؟=وضّح المسأله حدّ السوالف طريّه
مثل ماقيل رمح(ن) يزرقك به خصيمك=خير من رمح توعد فيه صبح وعشيّه
النوايا (شظايا) مير ربك عليمك=كل شي(ن) خفيّ بعلم رب البريّه
قلت بكسب نعيمك مير طحت بجحيمك=الله اعلم ماشفنا منك غير الاذّيه
يامدلّع.. تراك اتعبت روح(ن) تهيمك=ماحلا الوصل لامن جا بنفس(ن) رضّيه
كل يوم(ن) تعارضني مراويح غيمك=واتعب الرجل فالمخيال روحه وجيّه
وارجي الله يعجّل لي بهتّاف ديمك=والا عشقك ؟ سكن فالروح غصب(ن) عليّه
صار ماااعاااد يكفي الروح لفحة نسيمك=مير خلّك بدنيا الحب جزل العطيّه