يامدلع وش القصه عسى الله يديمك=في شروع الحبايب يكرهون الخفيّه
انت عارف وش اللي يستدير بصميمك؟=او عمايل مدلّع ما يحسب الخطيّه؟
كان قصدك جهاله فانت قلبك سليمك=وقلبي اللي تعذّب بين حرّه وكيه
وكان قصدك تغلّي في حشايه مقيمك=وكان قصدك سمحت.. اطلقت منّك يديّه
البلا صرت معرف فيك صدّك وهيمك=صرت اصدّق واكذّب بين ذيّه وذّيه
انا خلّك لطيف الروح والا غريمك؟=وضّح المسأله حدّ السوالف طريّه
مثل ماقيل رمح(ن) يزرقك به خصيمك=خير من رمح توعد فيه صبح وعشيّه
النوايا (شظايا) مير ربك عليمك=كل شي(ن) خفيّ بعلم رب البريّه
قلت بكسب نعيمك مير طحت بجحيمك=الله اعلم ماشفنا منك غير الاذّيه
يامدلّع.. تراك اتعبت روح(ن) تهيمك=ماحلا الوصل لامن جا بنفس(ن) رضّيه
كل يوم(ن) تعارضني مراويح غيمك=واتعب الرجل فالمخيال روحه وجيّه
وارجي الله يعجّل لي بهتّاف ديمك=والا عشقك ؟ سكن فالروح غصب(ن) عليّه
صار ماااعاااد يكفي الروح لفحة نسيمك=مير خلّك بدنيا الحب جزل العطيّه