وجهة نظر!!

[خالد القحطاني]

ايه القصايد لعبتي من يومني طفلٍ صغير
وايه التحدي مذهبي ومقارع فحول الشعر

كان التفاخر بالعدد عندي ترى منها الكثير
وكان المعاني صيتها حزته وانا كلي فخر

مانـي ابو الطيب ولا عنتـر ولا حتى جريـر
انا قحطاني لا قصد تطلع من حروفه درر

ابياتي لامن صغتها في ذمتي يمكن تطير
من فكرها من وعيها من نظمها وزن وبحر

مالي طقوس محدده لاني خبل لاني ضرير
هو ما يجول بخاطري يرسم على الصفحه فكر

شاعر خيالي موطني احساس من وحي الضمير
اجمع احاسيسي بشطر وانثر احاسيسي بشطر

ما اشبه بشعري أحد وازعل اذا قالوا كبيـــر
عمر اللـــقب ما همني ان زادني ولا قصــر

حتى الكتابه في الصحف والامسيات اللي تصير
مالي مزاج لسحرهم لا مالهم عندي ذكر

الشهره عندي لا غدى شعري كما البدر المنير
ايضوي للعالم مسى فيه المظالم والكدر

الشهره عندي لا وصل شعري الى قلب الفقير
اللي يسولف للعنى وشلون خاواه وصبـــر

الشهره عندي في قلم يكتب عن احلام الاسير
اللي فدى بروحه وطن واستوطن بقلب الأسر

الشهره عندي في دعاء الليل في الثلث الاخير
لا قمت ادعي خالقي رحماك يا رب البشــر

شعري رساله ساميه بين البشاره والنذير
ارسم ملامحها وانا شاعر ولي وجهة نظر

شاعر وقلبي أمسية صفق لها الجمع الغفير
دام التفاني رايتي من حق قلبي ينشهـر

يكفيه عانى ما لقى من صد واحزان وهجير
يكفيه لا جرب يحب يرجع في صدري منكسر

يمكن سواليف الهوى ماني بها واحد خبير
لكن اذا عشقي دنا خليت له قلبي خضــر

العمر يحرث ما مضي والشيب اتعبه المسير
لا طلت ارض ولا سما والحظ ما عنّه مفــــر

وللعلم يكفيني بخت ثنتين ما فيهم صغير
قحطان عزي والفخر والثانيه بلادي قطر

20-12-2005