"دمعة يتيمه"
مرحوم ياللي سمعتـه ترفـع الـرأس=نومـاس علمـه للنـفـوس العليـلـه
علمه ينومس بالفخـر طيـر قرنـاس=حـرٍ نهـار الضيـق كـلـن يجيـلـه
له موقفٍ مثـل الفـرح حـزة اليـاس=بالهقـوه اللـي كـل بـارق تخيـلـه
أبويـه اللـي للمواجـيـب نـبـراس=لـه سمعـةٍ ترفـع مـقـام القبيـلـه
له الوفـا والطيـب مبـدى ونومـاس=درب المـراجـل مايضّـيـع دليـلـه
صادق مشاعر يحتـوي قـوة البـاس=ماعـاش فـي دنيـاه لحظـه ذليـلـه
خبـر وفاتـه أودع الفكـر منـحـاس=وأنشـل فكـرً ماقـوى نـزف قيـلـه
يوم الفجيعه أعتلـت ضيـق الانفـاس=مالـوم مـن عّيـت عظامـه تشيلـه
قالوا توفـى وجاوبـت هـزة الـراس=مـع سقطـة الدمعـه وفـوح المليلـه
احساس صادق وأنجرف دون مقيـاس=فيض الحنان اللي سكـن بـي رحيلـه
في داخل أعماقه كمـا طفـل حّسـاس=أستوطن أعماقي وصـرت أنتمـي لـه
كتبـت شعـري دم بكفـوف قرطـاس=دمعـة يتيمـه تذكـره كــل ليـلـه
رغم البطا ، رغم الزمن ، رغم الارماس=باقـي معـي للحيـن صـوره جميلـه
ضميتها . حطيتهـا . بيـن الاقـواس=لاضاق منها الكـون صـدري يشيلـه
صوره لها نبضي ودمعـي والاحسـاس=صـورة شمـوخ وللمبـادي فضيـلـه
جعل العوض بقلوب ماتعـرف اليـاس=تدعـي لـه الرَحمـن منجـي دخيلـه
تطلب له الرحمـه مـن الله ولا بـاس=أعـداد مـن لبـا وصـلـى النفيـلـه
عـد النجـوم وعـد ماهـب نسنـاس=عـد الشجـر وأعـداد بـارق مخيلـه
في جاه منهـو عالـمٍ غيـب الانفـاس=فـي جنـة الفـردوس يصبـح مقيلـه
ينابيع السبيعي