أصعب سؤال إن سولفوا قالوا شفيه=معاد له طاري على بالك اليوم
وأول معك من وين مارحت طاريه=حتى عيونك حاربت لذة النوم
مدري شقول ومدري اللي أخفّيه=والبال من كثر التفاكير مزحوم
في خاطري شيٍ ولا ودي أحكيه=أخاف من كثر المشاريه واللوم
حاولت أبا أنسى مير ماني بـ ناسيه=حيث إن لي مبدأ وعادات وسلوم
شخصٍ بقلبي كنت بالحيل مغليه=وأبطيت حبه داخل القلب مرسوم
حبه سكن فالقلب بأقصى محانيه=ومن سبته جاني هواجيس وهموم
ياكثر مايخطي وانا كنت أداريه= وأنسى خطاه وزلّته تندمح دوم
واليوم بانت لي حقايق خطاويه=بيّن رداه وبانت علوم وعلوم
ماعاد لي رغبه ولا خاطرٍ فيه=وفي عشرته والله ماني بـ ملزوم
خلاص قلبي كل ماجاه يكفيه=يكفي من الغالين طعنات وسهوم
وأصعب سؤال إن قالوا الناس وش فيه=معاد له طاري على بالك اليوم