على جال الزمان اللي تحامل فيّ واشقاني=جلست أسايل النفس الشقيه ويش مشقيها
وتهت بغبة بحور الهموم وبحر الأحزاني=وزاد الهم هم ولا لقيت اللي يداويها
ولاني بالش بثورة هموم النفس من داني=ليامنه تشاوى هم ثوّر هم يعميها
وجيت الملم جروحي ولا ماعاد يمداني=تسايقتلي هجوسي وقامتلي تضويها
سرى ليلي وانا معها وكلٍ يتهم الثاني=تجادلني واجادلها من اولها لتاليها
ولابه واحدٍ منا معه حجة وبرهاني=ماغير نبادل التهمة وترميني وانا ارميها
وهذا حالنا يالين حان المذّن الثاني=صدح صوته ينادي للصلاة وخير مافيها
وعذت الله من الشاطان واخسى كل شاطاني=ولبت للندا نفسي ونسيت مايعنيها
وجيته مقبلٍ يمه وخوفي منه يحداني=جليسي سجل ذنوبي ونفسي قدم واليها
طلبته من سخا فضله من النيران ياقاني=ونفسي لايعذبها بنار يهول صاليها
وهلت دمعتي رهبة واحس بشي جواني=عجزت احدد ابعادة ولاني قادر ارويها
ولكن الصحيح اني هديت وهاد ماجاني=واحس بداخلي نشوة فرح ماكنت هاقيها
سبحان مفرج الكربة وتوبة قلب ولساني=لكون العابد المخلص يالين الروح ينهيها