·.¸.•°®»[فدوتـــك شعــــري]«®°·.¸.•

[نوض سدير]

القصيــدة ...إهداء ..إلى من هو...سبب رحلة نجاحي..بعد الله سبحانه..

إهداء..ليس الأخير..ولكن لسد جوع تلك المشاعر التي تستثيرني في كل

إشراقة شمس فجر ٍ يطرد الظلام ويعلن ميلاد يوم جديد...

إهـــــــــدائــي...

إلى أعز إنسان ....

إلى ..// والـــــــدي الغالي،،،

تقبلها...رغم قصورها..
:
:

قد تكون قصيدتي طويلة وأنا ممن يعتنق فكرة "الإيجاز " في القصائد

ولكن لم يكن من السهل إيجاز سنين في بضعة أبيات ..

وكانت الحروف تنساب مني دون تمخض!!

فدوتــــــــــك شــــــــعري

الشعِر موج ٍ عتيٍّ والتجارب مالها اعداد=والقصايد غبة بحور مااحد يوصل مداها
والسفينة مالها الا قايد للبحر معتاد=قايد وربان بحر خبرته جلجل صداها
ذاك ابوي القرم شيخ الطيبين وند الانداد=هو سبب رحلة نجاحي .. نور دنياي وضياها
ذاك ابوي اللي له الطولات تشهد له والامجاد=و الخلايق تقصده لازاد في الدنيا غثاها
عون من جا مستجير وفزعة اللي جاه وراد=ونفسه لكل الخلايق زايد والله وفاها
ذاك ابوي وعزوتي ..ذخري ولي عز ومسناد=ونفسي احسدها عليه اليوم يوم الله عطاها
ذاك ابوي اللي بعطفه ضمني في قرب وابعاد=ودي احضنه امتنان حيثه لنفسي هناها
ذاك ابوي اللي ترفع عن تفاهات وعن احقاد=شامخ جلد صبور في عنا الدنيا وبلاها
رجل وكفو وصيته عم كل ديار وبلاد =وبالذكاء نفسه تسامت ياجعل ربي يحماها
ذاك ابوي اللي معيشني مابين افراح واعياد=واصعب اللحظات عنده لاكسا بنته شقاها
ذاك ابوي اللي غمرني حب وعطف وتوداد=له يدين حانية ياجعلني ماافقد عطاها
العطا في وسط كفه لويشح الوقت يزداد=ونفسه اللي للمعالي دايم تسبق خطاها
ذاك ابوي اللي أفاخر به مابين جموع وافراد=وماحد بيلوم بنت يوم تفخر في ذراها
اشهد انه بالعطا ضاري ومفطور ومعتاد=ونفسه الذربة على الطولات موثوق عراها
العطوف ابو اليتامى والضعوف وكل وفـّاد=مايجيه احد ويرحل كود حاجاته قضاها
الكريم ابن المكارم والكرم من ورث الاجداد=هامته لولا الصلاة وطاعة الله ماثناها
والله انه صادق افعال وصمول ووافي اوعاد=والمجالس والنشاما تفتخر به يوم جاها
يايبه اغليك والله والغلا لك دوم يزداد=انت لي موئل وموطن والهوا وارضي وسماها
يايبه والله احبك حب لاماهوب معتاد=والحيا نفسي منعها لاتبين لك غلاها
الرذايل مااعرفها والزمن ياابوي جلاد=ومنك أخذت أنا الصفات اللي لي المولى رضاها
والله اني للتوافه لويطول العمر ماانقاد=وهامتك ماتنتطمن يانظر عيني وماها
شاعرة وأكتب وحولي مستغيضين وحساد=وغايتي هي رضاك عني ودعوتك (ربي يحماها)
يايبه بعض العواذل لارموني بحقد وش عاد=دام انا ذخري وفخري روح ٍ لروحي فداها
يايبه تراي بنتك وانت لي عون وإمداد=لو يطول الوقت روحي باقية لك في وفاها
يايبه شاني رفعته بالأدب واخلاقي الزاد=وماكتبت اللي ينزل راسك من اعلى علاها
يايبه شعري نظمته (دين) و(توجيه) و(ارشاد)=والهدف من هالقصايد نصح كل اللي قراها
ياعسى ربي يسلمنا من انجاس ومن اوغاد=وابقى طول العمر بنتك وانت ياغالي غلاها
السهر لو رام عيني وامتلت ياابويه سهاد=فانت للاوجاع بلسم وانت لجروحي دواها
والهنا بدفتر حياتي له مع الايام ميلاد=وداخل الذكرى لك اكبر صفحة يبرق سناها
يايبه بذرك بذرت وللحصاد اليوم ميعاد=وهذي هي بذرتك واحصد يايبه صافي عطاها
لاانكفت عيني عن عيونك ياابوي وصارن بعاد=تظلم الدنيا بعيني واحسب ان الموت جاها
ولاجمعني فيك ربي كنني أملك لي بلاد=واشعر بإن الحياة اليوم في قمة رخاها
يايبه لاضقت مني صابني من ضيقك اجهاد=ودي املي بالسعادة دنيتك واسقي حياها
اتخذت الدين والعلم بحياتي نهج وعماد=وحالفه ماامشي دروب ماتسر اللي مشاها
ما أبي أتيه بالشعر وأهيم بشعب وواد=وارمي بنفسي على الدنيا واحملها غثاها
يايبه روحي بقربك حققت لي حلم ومراد=واشكر الله جل شانه يومه اللي لي هداها
فدوتك ياابوي شعري وكل باقي لغة الضاد=وفدوتك نفسي وروحي يايبه واللي وراها
وفدوتك من كان صدره ممتلي غيض واحقاد=جعل ربي في عيون اهل الحسد يقذف عماها
وياعساك بخير يابوي وعساك بيسر واسعاد=وابشر ببنت على عهد الشرف يزهي نباها

ابنتك المخـــلصـــة :

نــــــوض....ســـدير...