---- يـــاســيّــد الــبــيــض والــحــور !! ----

[محمد بن حزام]

.


السلام عليكم ورحمة الله وبركاته ..
أخواني .. أخواتي .. أسعد الله جميع اوقاتكم ،،،
=========================================


أتمنى أن يكون هذا النص كرت معايدة بيني وبين كل من يقع نظره على هذا المتصفح ...

وكل عام وانتم بخير وسعادة ... وعسى أن يعود على الجميع أعوام وأعوام ،،،

كل عام وانت بخير يا مضفي النور = وكل عيد وانت العيد يا حزمة أنوار
العيد باقبالك غدا كلّه سرور = وحبّك بقلبي ماله اليوم أعذار
يا صاحبي يا سيّد البيض والحور = يا منوة الحرّ المسقّى من أحرار
باسباب حبّك شاعرك صار مشهور = بعلم المحبّه صار دكتور .. بيطار
شيّدت لك في داخلي قصور وقصور = واهديت لك شعر ٍ به المهتوي ثار
شعر ٍ تغنت به معاليق جمهور = هزّ الفيافي والمداين والأمصار
مغرور في حبّك نعم حيل مغرور = ويّاك أحس إنّي تملكت الأقطار
ويّاك أحس إنّي على الهم منصور = ترضخ لي آمالي وتضحك لي اقدار
والله أحبّك دون راي وبلا شور = وما همّني لو كل عذّالي تغار
أنت الجبر وآنا بليّاك مكسور = وانت الفرح وآنا بليّاك منهار
لا تندهش منّي وانا فيك معذور = والله ما مثلك من الناس قد صار
يكفيني ان انفاسك ازهار وعطور = واحساسك الهتّان وعيونك أخطار
أدري غرامي صوبك إحساس مغمور = محطوط ما بين المعاليق تذكار
تعال واسكن بين الاضلاع لك دور = قلبي لك المجلس وصدري لك الدار
اقبل تمركى جنبي .. الحال ميسور= يا زينها قلبين بالحب ّ سمّار
حيّاك لا تخجل ولا تقلب الدور= الدور دورك لا تردد وتحتار
ابي ورودك وابشر بطيب منثور =وابشر اذا ودك ابضرب لك الطار
يالله تمايل بين ساحر ومسحور = ودي معك أسهر إلى حد ّ الاسحار
هاك المعاني ريحها ريحة زهور =وهاك المواني والمداين والاسفار
درب ٍ تمرّه يا ابيض الوجه ممطور= وروح ٍ تداعبها تداعبك باسرار
تحكي لك انك سيّد البيض والحور = وتبصم لك انك قطعة الثلج والنار
وتشهد لك انك عيدها ياول النور = والقرب ماله صوبك اليوم أعذار

وسلامتكم ..

أخوكم
محمد بن حزام