الصراحه

[عبدالمحسن الشاهر]

عذرا عن التأخير

ولكن هذه مشاركتي واتمنى ان ترتقي لذائقتكم وتنال إعجابكم

الصراحه شي جميل ولكنها قد تكون قاسية في بعض الأحيان

الصراحة ما ابي منـك الصراحـة=لا تقول انك معـي دايـم صريـح
لا تحاول تلعـب الـدور بوقاحـه=ما ابي اقسى واقـول انـك قبيـح
غرتك دنياك فـي شكـل انفتاحـه=الأصول أصول وافهم يـا فصيـح
يوم تدرك بالخطا حجـم الازاحـه=ليه قلبي من غـلا قلبـك تزيـح
نيتي لـك خيـر لا نيـة إطاحـه=وأنت ودك لو أنـا بيـدك أطيـح
خافقي المجروح غارق في جراحه=تو جرحك ما برى منـه الجريـح
بعد ما أعلنت سبيـه وإجتياحـه=طاح عود ٍ في فراشه لـك طريـح
تغترف ذنب الخطايـا و الإناحـه=وبالجنازه ماشيٍ تبكـي وتصيـح
وللمحارم تفتـح أبـواب الإباحـة=بعدهـا والعـذر منـي تستبيـح؟
لو سألت العفو عن معنى السماحه=كان تدرك صورة الوجه السميـح
ولو سألت النور عن سبل الإضاحه=يتضحلك بالسبـل درب الصحيـح
والغريق اللي جهل علم السباحـه=في عيونه يحسب القشـه صفيـح
والسحاب إليا حرمنا مـن قراحـه=لا نلوم الأرض لا شحـت بشيـح
خافقي لثنيه وأكبح مـن جماحـه=لو سرجت من الغلا دمع الشحيـح
لا تضن أنه معك يلقـى ارتياحـه=هو كذا مرتـاح طيـب مستريـح
قوم روح روحة سهيـل لمراحـه=لا تعود لو سمعتـه لـك يصيـح
لو خذيت من البحر خصلة ملاحـه=ما اصدق صاحب الوجـه المليـح
ما خبرت أن المساء ينكر صباحه=وما هقيت ان الردى به هب ريـح
والصراحه كـان ودك بالصراحـه=تدعي بالصدق وانت الصدق ميـح

[/poem]

شكرا لمروركم الكريم
وردكم يشرفني