لي متى ؟؟؟ (( لكل غائب))

[حمد الأسمري]

اتفقت آنا وقلبيْ نختلِفْ مَرّة عليك=هُوْ يقول إنّه يحبّك وأنا أقلّه ما هُو قدِّي
هذا حالي وحال قلبيْ كِلنا والله نبيك=مِنْ زهقنا وإنتْ غايب فينا وصْلَت للتحدِّي
وشْ نسوّي مِن تعبنا وأحنا والله نرتجيك=خابرينك كل مرَّة ما تلاحظها وتعدِّي
بسْ هالمرَّة أنفضحنا وأنكفشنا بين يديك=لِنْ حِبّك شَيْ فاضح لا بكيفه ولا بيدِّي
غيبتك طالت حبيبي يا تجينا أو نجيك=ألف غربة في غيابك تِشْقِيَ النّفس وتِهِدِّي
إيه يا روعة زماني مالنا إلا عينيك=لا تخلّي البُعد يطوي بالحِزنْ سَعْدَكْ وسَعْدِي
كِلّ دمعة في عيوني حايرة للحين فيك=أتعبتنيْ وأنهكتنيْْ وأضعفتْ حَيليْ وجَهْدِي
ودِّي أَصَرَخْ في هدوئي ولا مُبالاتَك أبيك=ودِّي أترجّى طيوفك تِبْقى فْـ أحضاني وعِنْدِي
ودِّي قَبْل العِيد يِقْبِلْ فيْ سِمايا ألتِقِيكْ=حَتّى لَوْ أجْمَلْ ثِيَابيْ ما غَدَىْ في اللّبسْ قَدِّي
مَرّت العِشْرينْ وإحْنا بِالأواخِر نِحْتريكْ =لَيْ مِتَى وإحْنا فْـ غِيابِكْ عايشين بِهَـ التّحَدِّي