((..خبرة ثمان اسنين في موت الأحلام..))..!

[شامخ الرشيدي]

السلام عليكم ورحمة الله وبركاته

أهديكم هذه القصيدة الجديدة .. لعلها تحوز على الرضاء ..

والمعذرة على قصوري مقدما ً ..





/

لاهنت يالغالي على مسح الأرقام = كمّل لي المعروف وألغ الشريحه
العام هذا .. حظي اقشر ولا قام = ( مثله مثل غيره) ( عسى الله يبيحه )
ادموع همّ وحزن يا سود الأيام = في ليلة ٍ كل البشر مستريحه
خبرة ثمان اسنين في موت الأحلام = استقبله حلمي .. وأجهز ضريحه
انام اودع حلم .. وأصحى ولا انام = بأيامي ( المتردية والنطيحه ..!)
ارثي حياتي وألتحف حزن الأيتام = وأشوف حلمي يبتسم لي وأصيحه ..!
لين اقتلت قلبي على دين الإسلام = خوض الحروب المهلكات الذبيحه
وأشوف دمي ساح مع حبر الأقلام = على البياض بكل كلمة صحيحه
يكتب شقى.. يكتب حزن .. يكتب آلام = يكتب جروح القلب لا هبّ ريحه
يخلط شقى الإلهام .. في حزن الإلهام = بمعادلة رجح عباره رجيحه ..!
رجح ( قتيل أحلام ) عن ( قبر الأسقام) = وأمضى على الدمعات ( فرصة سنيحه )..!
ودع حياته والجسم والعقل صام = عن كل دعوات الحياة القبيحه
نقرأ وش اللي يكتبه قبل الإعدام = قبل الزمن يحرق ورقنا كديحه
صارت قضيه ( مقتل المدعى العام ) = فضيحة ٍ يا كبرها من فضيحه
يبحث عنه تحت المباني والأحطام = واللي بقى من لحم جسمه شريحه ..!
بدد سكون الناس في وسط الأزحام = صوت ٍ .. خرق درع الضلوع الشفيحه
أول صلاة المِـَـيت ( تكبيره إحرام = بين الجموع اللي تصلي لحيحه
في محضر القصة تناولت الأتهام = وسجلت من نبع البحور .. ( النصيحه ..!)
يا سكة العشاق .. بإسنين الإجرام = لا يدخلك غير القلوب الصريحه
سوي لنا منفذ .. وحطي لك اقسام = وإسطورة ٍ .. في عالم الحب صيحه
و ختم ٍ على البصمة .. وقفل ٍ للأختام = وجسر ٍ بعرض الكون ما أحد ٍ يزيحه ..!
ممزوج من فولاذ والذهب والخام = في بحر .. ترنيم المحب وصديحه
على ضفافه .. ( جنه الحب ) و أعلام = تقرأ بها .. صدق المكان ومديحه
ما وصلها ألا من دموعه والأنسام = مبذولة ٍ لأجل الوفاء تستبيحه
مايدخل ( أرهابي محبه ) له أرحام = دخلوا بها .. والحال ماهي صليحه
لا للخيانه .. لا وساطات .. لا إعلام = بس الوفاء .. يوم الشريحه سميحه
اقبل قوي الحب .. ما تهم الأجسام = وعليك بالله بالوجيه الفليحه
ممنوع تقبل لأجلهم صفقة إبرام = كذا تعيش الناس .. حالة مريحه
كذا كذا .. عشت بتناقض ولا أنلام = غريب دار . . وكل طرقه كليحه
كنت ارتجي من واقعي عكس الأوهام = دام السنين لطعنتي مستبيحه
أمشي ثلاث أمتار وآقف بالأعوام = واللي بقى بيدي .. ثلج وصفيحه
وزن الأمل فيني .. ولا مليّ إجرام = ومقدار عزمي ثوّر أقسى قريحه
مستقبلا ً .. يمضي على حلو الأنغام = استهدفه صاروخ وأعلن مطيحه
ودمر مراكز قوته .. زرع الألغام = وبروجه اللي عاليات ٍ طريحه
لو صحت بأعلى الصوت وأتعبت الأقدام = يرجع صدى صوتي بنبره جريحه
يا شامخ الشامخ .. بتوقيع الإبهام = ما عاد بالدنيا قلوب ٍ نصيحه
بأضم قلبي عن سكاكين الأيام = وأقصر رجولي عن دروب ٍ شحيحه
مادام ما تمتّ لنا ذيك الأحلام = لا يخوفك كسر القلم والفضيحه
كلمة ( وفاء ) متبدلة من كذا عام = صارت ( وفاه ) وكل (( كذبه) صحيحه)..!
طويت صحايفنا .. وجفن الأقلام = في ليلة ٍ .. كل البشر مستريحه ..!

وسلامتكم ..

مع فائق التقدير


اخوكم

الشامخ