يابخت قلب ن من غرامه خالي - مصافحة صيفيه

[ثامـــر آل محمـــد]

مصافحه صيفية متواضعه .. بعد غياب دام عام

اتمنى ان ترتقي لذائقتكم

وكل عام وانتم بالف خير

يابخت قلب ن من غرامه خالي=ولادرى بالحب والحنيه
ولا شرب من كاسة الغربالي=ولا إنحرق بالشوق فالصيفيه
وجدي على من هو معذب حالي=وجد اليتيم ولبسته عاريه
اللي خفوقي له غدى منزالي=في كل حين بليل وبصبحيه
سافر واخذ قلبي معاه موالي=وخلى الجسد واركى عليه الكيه
في تركيا ويا خواله سالي=ولادرى عني ولا وش فيه
والله لو يدري بما في بالي=انه ليرجع بكره العصريه
لايحسب ان العشق لعب عيالي=ولا سواة الحاجه العاديه
العشق يابن الناس هد جبالي=مافيه لارحمه ولا ماويه
وان كان بين الناس قدرك عالي=يرميك من عاليك للسفليه
مثل العسل لامن بديته حالي=حتى تغوص الغبه البحريه
من بعدها لامن فقدت الغالي=يجتاح قلبك قنبله ذريه
ماينفعك جرتك للموالي=إليا عسفت هجوسك الشعريه
ولاينفعك ميقاف عم وخالي=ولاتنفعك جمعية ن خيريه
ولاينفعك بنك البلاد المالي=ولاعيادات الطب النفسيه
ماينفعك غير الرحيم الوالي=إليا دعيته من صفاوة نيه
يالله تصبرني وتجبر حالي=حتى يجي من غيبة الصيفيه

ثامر بن سعيد آل محمد