الشاعر الشيخ محمد بن راشد بن مهنا النعيمي

[عبدالله النعيمي]

ما كان لي في بدع الامثال رغبه=لولا الخوى اللي زما البعد دونـه
اللي نخايل كـل يـوم الدربـه=والكل منـا ملهياتـه اشطونـه
ومهما نفكر في نزوحه وقربـه=حقه من الواجب علينا نصونـه
خوينـا معنـا برايـه وقلـبـه=وان غاب شخصه وصلنا تيلفونه
عبد الله الفندى وحن نفتخـر بـه=نذكر وفـاه وغيرنـا يذكرونـه
واللي جعلنا راس مالـه وكسبـه=حقه علينا مـا نخيـب اظنونـه
الاجواد قالوا تملك الحر شربـه=واللاش قالوا ملح زادك يخونـه
وقالوا بعد للطيب زرع وتربـه=والطيب حن زرعه وحنا زبونه
وزرع يفك الوجه من كل كربـه=والزرع الاخر ما يوفي اديونـه
خلو لنا الاجـداد سلـم ورتبـه=والامجاد سلم اجدودهم يتبعونـه
والمرجله ما هي هوايه وطربـه=المرجله حمـل اثقـال اوزونـه
حمل ثقيل يتعب اللي نهض بـه=ولو كان حيد وشايبـات امتونـه
ولو كان حيد وضاري قد دهل به=اهديب شيـال الـروا والمؤنـه
والمرجله كود على اللاش صعبه=ما جابها اللي يرتضي بالمهونـه
واللي يقول الهون قسمه وكتبـه=هذا الجبان اللي لنـا يوصفونـه
وانصحك من ذا لا تشد الظهر به=عزى لعينن في رجـاه مغبونـه
واياك من ذا النوع لا تحتزم بـه=راسه وساسه للـردى يجذبونـه
خويك وعونك دام دنياك خصبه=ودامه يحصل ما تعضه اسنونـه
ولادبرت دنياك لا تغتبـط بـه=تراه اول من تفـارق اضعونـه
ويا حيسفي يا هي مصيبه ونكبه=ان كان فـي خلاننـا ذالنمونـه