رساله الى قلوبكم

[ياسر سعود]

راكب اللي لاتعلت تسبق الصوت بثواني=مايلهّي من ركبها كود تقليب الجريده
لاتواست في سماها ماتشاهد بالعياني=دربها مرسوم خطه لاتزل ولاتحيده
ماترّيح للوقود ولاتبي شد العناني=قبل ماتربط حزامك قالوا الرحله سعيده
تاصل الصاحب مبارك قبل اوقف من مكاني=قبل مايثني سلامه ياصل المكتوب بيده
صاحبٍ من طيب ذاته لانسيت ولانساني=لاتبعدنا الظروف ولاتفرقنا البعيده
اذخره لاجاء لزومي او تحداني زماني=وادري انه في مكانه والصعيبه ماتكيده
بانشده واخذ علومه والمعاني بالمثاني=والنوايا في عروق القلب والا في وريده
كيف ابااعرف من صدقني وان نصحته ماعصاني=وقفته لامن بغيته عادةٍ ماهي جديده
من بغا الحاجه عنا لك قام يحلف باليماني=والكلام يضيع سوقه لاتحدتك العنيده
لابغيته في لزومك صار وجهه وجه ثاني=يوم شوفك من جهنم والفراق ايام عيده
والبشر واجد وحنا نسمع هروج اللساني=والله اعلم عن رمادٍ تحته النار الوقيده
من قصر رفعة جداره لايقول الله بلاني=ينخل القمح وسماجه لين يصفى له حصيده
من يطيع النفس مره تطمع بدرب الهواني=طاعة النفس بهواها عكس الاشوار السديده
والمكاسب بالقناعه والخساره بالرهاني=والطمع عاده وطبع لحرس المال وعبيده
والعمر ساعه ويقضي وغير وجه الله فاني=وكلن يحصل طريقه بالنهايه من رصيده
والبشر تذكر فلان بن فلان بن فلاني=مايحصل غير ذكره سيرة اسمه تستعيده
والسفينه في بحرها ماتريد الا المواني=وانت ربان السفينه كان راحت به شريده
وانت من عندك تجيب الواحده مثل الثماني=وتعرف الخطوه وش اللي من وراها تستفيده
واختم القول بكلامٍ اطيب من الزعفراني=عد مالاحت بروق المزن يقفاها رعيده
من سمعني به يصلي يكسب بلفظه حساني=على نبي الله محمد بشر ووصل وعيده