اللـقـا يـوم ( الربــــوع )

[أكرم التلاوي]

اللقا ... ( يوم الربوع )

واعدتني واللقا يوم ( الربوع ) =وطاح قلبي وقمت بيدي .. أرفعه
واستثار الشوق ما بين الضلوع =والخفوق أضحى بوسطه .. معمعه
جا نهار ( السبت ) وأشعلت الشموع =وغرفتي للورد صارت .. مزرعه
و ( الأحد ) غنيت وأفراحي جموع =وسلسبيل الحب صافي .. أجرعه
و ( الثنين ) تفرقوا حزة رجوع =كل واحد له طريقن .. يقطعه
و ( الثلوث ) الشعر في صدري يلوع =له زفيرن حتى الأطرش .. يسمعه
و ( الخميس ) بمحجري نهر الدموع =حارقن لو طاح صارت .. زوبعه
ضعت انا في ( جمعتي ) وضاع الخشوع =قمت أصبر نبض قلبي .. وأخدعه
من حبيبن بالهوى عنده شروع =قتل قلبي شي عادي .. يصنعه
من خلقت وما عرف قلبي خضوع =مير وحده في عيونه .. أخضعه
الخفوق اللي مـِترّس بالدروع =كيف مدري ! صار خاتم .. بإصبعه
من أمرني جيت له كرهن وطوع =لو أمرني في وريدي .. بقطعه
ذوقتني بالمحبه طعم جوع =وعلمتني إنها من يشبعه
واعدتني واللقا يوم ( الربوع )=وإنتهى الأسبوع وما جا ( الأربعا )