القصايد

[هيكل الشمري]

قطيت في وجه الهوا كل الأوراق = واتعاب فكري طيرتها الهبايب
ناظرتها لحظات في ساعة افراق = مرت علي ودموع عيني سكايب
هذاك بيتٍ به على الزين مالاق = وهذي ( دموع الوجد ) وهمس الحبايب
وهذي قصيدة شعشعت شمس الاشراق = وهذي قصيده قلتها لأجل غايب
قطيتهن من زود همي والارهاق = وفكري تشتت ماحسبت الحسايب
نقضت انا من هاجسي كل ميثاق = واصبحت انا مابين مخطي وصايب
حلمي تبدد بالهوا وخاطري ضاق = وضاقت عليه قاع دنيا العجايب
زادت لواهيب الحشا وسط الاعماق = وجروح قلبي من سناها عطايب
مافاد جرحي والالم كل ترياق = مامن امل للجرح ماله طبايب
ياقلب عبر عن تفاصيل الأشواق = وارقى على متن الهوا والسحايب
ولاترتجي من وابل الهم الاشفاق = الهم : خامه به جميع الشوايب