زحمة الياس

[محمد بن قطنان]

السلام عليكم


اتمنى ان يكون النص جميلا في اذهانكم
كما كان وافيا في قيامه بالواجب معي وماقصر ..

على الدروب العتم في زحمة الياس=تقفي صواديف الزمان وتجيني
أمرار افرّغها على فرخ قرطاس= وامرار اعانقها وهي تحتويني
واشب ناري في ضلوعي بهوجاس=واركي الدلال مقنّدات الونيني
واجمع شتاتي بين ضيقي والاتعاس=ياكبر شي(ن) كانيه في كنيني
واكرج متاهاتي وابيّن لها الباس=وهي كما (الزئبق)يسار ويميني
ياحيلة الله وصّلت حدّ الانفاس=ياشيب عيني من مقالب سنيني
اغرس نوايا طيب والطيب نوماس=وابلش بسلّة شوكها من يديني
واغرق بدم(ن)داخ من نزفه الراس=اخلص واضحّي والعوض في جبيني
كم واحد(ن) من كدرة الوقت محتاس=يمشي مع العالم ووضعه سكيني
وانا على ماقال :عايش مع الناس=وارجي عسى عوج الليالي تزيني
كبّرت لله ما للآلام مقياس=وهلّلت مالي غير ربي عويني
الله يرحم صاحب(ن) مثل الالماس=راعي سجاياً تطرب الظايقيني
طويت عقبه رمز الاصحاب من ساس=يفدى ثراً ضمّه خفوقي وعيني
اذكر زمانه كل ماهبّ نسناس=واثبّت الغربه وتفتن سنيني
(صالح) ايلا عدّوا مع الناس الاجناس=اعدّ زوله نشوة الروح فيني