مواجيع المحبه

[ناصر الشريف]

يا مواجيع المحبه يا سواليف اللسان= يا جروح القلب مدري يا حروف القافيه
الشوارع ما تودي تاهت بحضن المكان = والمكان امست عيونه يا الشوارع غافيه
ليل من دونه ظلام وجرح خافي ما يبان=في معاليق الحشا تحت الضلوع الحانيه
الفرح ضيع طريقه والعشر رجعت ثمان = بين سندان السنين ومطرقته الحاميه
من ضميرٍ ذاق مر الكيف من كاس الزمان= في فضاء عمره يدور لليال الحاليه
مزهبي هجر وبعاد ودمع من قل الحنان= أنثره وارميه في وجه النجوم الساريه
ليمتى يا جرح تنزف ليمتى ترجي الأمان= ليمتى تنخى مشاعر قلب صارت باليه
قلبي المحروم محني مثل عود الخيزران=أمست سهومه تعاقب كلها متاليه
سبتك يا الحب من هجرك تجرعت الهوان= في غلا من شح وصله للقلوب الوافيه
ولا انا باقي بعهدك كلها عندي سيان= صد ولا هجر احبك فالحشا متساويه
وين ما رحت ارتوي بك منك عذب الغصن لان= يا دوى حالي مذاقه للكبود الضاميه
هي كذا صدق المشاعر مالها عندك طمان= دامت الغالي مجافي ما يقدر غاليه
بين رمشك حط قلبي ما لقى غيرك مكان=واحضنه واترك جروحه في عيونك غافيه