عاشر سنة

[أحمد العياف]

ألا يا عــاذلي كــــف الـحـــكــــي مليـــت قيل وقال


أنا ما سمع في الدنيا سوالــف خاب قايلْها


تحســــدوني على الونـة .. تحسبـــون إنها مــــوال


وهـــــي زود المصايب من عناها رحت أعللها


تظنوني خليّ البال .. وانا ماني خلـــــــــيّ البـــال


أنا طبعــــــــــي كذا .. وإن كثرة الألآم اجهلْـها


وأنا يوم أبتسم للخلـق .. ما مـن قلـــة الأهـــــــوال


ولو به من تـــســـمّــع قصتي.. يبكي من أولْها


شقيت بْدنيتي طفلٍ .. مغالط فرحـة الأطـفــــال


كبــــرت وْصرت ملزومٍ .. على الشدة بزايلْـها


ثمان سنين.. من عمري مـتاهــة غربـة وْتـرحال


بســــــــكه في غياهبها .. ضياع لْدرب نازلْـها


ثمان سنين.. عـالطرقي هـضـــابٍ سنـّـدت بجبال

ووديانٍ تحت سفــــــحٍ .. مع الوعره مداهــلْـها


ثمان سنين .. والمركــــــب عتـيـقٍ من رداة الحــال

غدا له ( فـ..البحر ) قفرٍ .. كثر ما صال به ولْـهـا


ثمان سنين.. ولت بي.. وطاحـت بي .. كثير آمال

وأمني نفسي لا تجــــزع .. وتطــلبني وسائلْـها


وأصبر متني لا يشكي حــمــولٍ .. شالها الجمـــــال

على دنياً متاعبها .. تمــــــيّـل كـتــــف حاملْـها


مواجع تلفي وتقفي .. وحزنٍ خالـطـــه غربـــال

وحلمٍ دوزن جْـروحي القديمة .. لـيـــن مدملْـها


وضيقه تخنــــــــــق العبرة .. وعيـنٍ دمعها همــال

واسلّي عيني لا تبكي .. وتفــــضحـني همايلْـها


وليلٍ خيمــــــــــــته همي .. وصبح ما بداله فــال

وأردد آآآهةٍ بالصدر .. تـحــايلني وحايلْها


ثمان سنين .. يا عاشر سنة قـــد لـي على ذا الحال

أسـامـر خطـــوتي بالدرب.. ْوهـــد الـوقـــت كاهـلْــهــا.



شعر .. أحمد العياف