هنــا سيكـون موعـدي .. معـي !

[بسـام بن عبدالعزيـز]

ضيقـه !

مهموم ,, ذاك إلي غدا فيه ضيقـــه!=وش عاد من قلبه غدا فيه ضيقــات؟
همٍ يزول ,, ولا انتهى في طريقـــــه=غيره يجيني ,, يدخل القلب بسكـــات
عزّاه ,, ياذيك الأماني غريقـــــه=عزّاه ,, يا عمرٍ قضى في متاهـــات
مانيب أنااول من همومه تعيقــــه=أدري ,, ولااول من سهرها ولا بـات
بس هي كذا ,, تشعل بصدرك حريقـه=من زود همّك ,, تكتب حروف وأبيــات
في وسط جوفك ,, خافيٍ ما تطيقــــه=مافات حيٍ كنه اليوم ما مـــــات
تِذْكر زمانٍ به مشاعر رقيقـــــه=تِذْكر فراقٍ ساقه الوقت دمعــــات
تِذْكر رفيقٍ ما وفا مع رفيقـــــه=شخصٍ يبيعك لا ترجّيت فزعـــات
تِذْكر مشاعر للمحاجر عشيقــــه=تعشق عذابك لا غدا فيك لوعـــات
تِذْكر غريبٍ مبتعد نشف ريقــــه=يشتاق لا هبّت بذكراه نسمــــات
كلٍ وهمّه ,, واختصرت الحقيقــــه=ولاّ ترى فيني على الوقت شرهـــات
ضيقة تروح ,, وتدخل القلب ضيقــه=وياعزتي للي قضى العمر ضيقــــات

[بسـام بن عبدالعزيـز]

.
.

خذ من الدنيـا .. فَرحْها .. وحزنها .. لا لا يهمّك=ماهو يعني .. لا يهمك ! .. بس لا يأثـر عليك
صح .. تحتاج الحزن مرّات .. ينثرك .. ويلمّك=بس .. لا تنسى .. بإن الله .. يبي الإيمان فيك
ابتسامك .. يعني إنك .. مؤمن .. بأقدار همّك=ابتسامك .. يفتح الأبواب .. للصبح .. ويجيك
يعني .. افتحها يدينك .. للفرح .. يركض .. يضمّك=ياااخي صدقني .. فديتك .. كل هالدنيا .. تبيك

لـ بسـام

[بسـام بن عبدالعزيـز]

تعبـت فراق

تعبـت أشتاق !

تعبـت .. وشوفني بعدك

كياني ضـاق !

.

يابوي .. إرجـع !

فديـت رجولك الثنيتـن

لي إرجـع

فديتك .. وينها أيامك .. وفرحي ويـن !

تعبـت أشتـاق !

تعبـت

وما بقى فينـي

مكان .. يحس بي .. ويني !

.

أنا بعدك

على عهدك

أشيل خطــاي

وأحاول أمشي دروبـك

وذي دنياي

على كثر الألـم فيهـا

خذيتـك للأمــل مسعاي !

ولكنّي

على كثر الأمـل

أرجـع

وعـوّد .. للتعــب

وأصرخ

تعبـت فراق

تعبـت أشتـاااااااق !

~ . ~

.
.
.

اعتـرف

إني دايم أصرخ

ويـنـــك يـبــــه !؟

[بسـام بن عبدالعزيـز]

يا عسى ربي .. يغَفْر ذنوب موتى المسلمين=وبالعفو .. يَعْفو برحمه .. ما يحققها سواه
يالله إني طالبك .. تقبل دعاء الصالحين=وتكتب لـ عمّي وسط قبره من الجنه هناه
ترحمه .. تغفر ذنوبه .. تسعده لو هو دفين=ترزقه .. برد .. وسلام .. ونور .. في ظلمة ثراه
ذا أبوفيصل .. حبيب الناس .. مير الله يعين=كيف .. ما صرنا نشوفه ! .. كيف ما نسمع نداه !
كان لا أرخى يمينه .. ما تجي جنبه يمين=وبالوفا .. مهما نحاول .. ما لحق أحدٍ وفاه
كان له قلبٍ كبير .. شايله وسط اليدين=كل من حوله طلبه شوي .. قطع منه .. وعطاه
راح .. جعل اللي يحبّه .. ما تعنّيه السنين=راح .. جعل اللي بقى يفداه .. وذي روحي فداه
راح .. حنا اللي بقينا .. يا معين الصابرين=حكمة الله .. ويصبر المبلي .. إذا ربي بلاه

.
.
.
.

الله يرحمه ويسكنه الجنه

[بسـام بن عبدالعزيـز]

لا تحزني

فينا ترا باقي عمر

للي رحل

باقي أمل

في عمرنا .. باقي كثير

للي تركنا .. وإندفن !

باقي صلاة

باقي دعـاء

باقي ابتسامة لأجلهم !

لأجل الأمل

واللي رحل

.
.
.
.

لهـا

ولي !

[بسـام بن عبدالعزيـز]

بين هقوات الصباح .. وطيب لحظات المسـا=جيت في بالي من أحلام الطفولة .. سالفـه !

. . .

عيش .. عيش

ولا يهمّك

إن حضر

أو ما حضر !

مادام له ذوق .. ونظـر !

ما راح ينسى .. طلتك

لا جيت له

ودّك تعيـش !

وشاف في وجهك

كذا

دمعـة .. تخالطها ابتسامة !

ومن كثر ماهو تأثـر

جاك واحساسه .. تنثّـر

بين يدينك

لجل عينـك

لجل .. قمّـة حنينـك

لأنه يدري

عن وفاك

وعن غلاك

وإنك أصلاً ما نصيتـه

إلاّ لأنك .. بس لعيونـه

تعيــش !

ياخي .. عيـش !

[بسـام بن عبدالعزيـز]

كانت مُعاناتي هُنـا

~ ~ ~

من وين ألاقيها !

يا حظ الهَـمّ

في قلبي غَـمّ

أجل وشلون لا راحـوا ؟

غلا

مشعل

وآخرهم يجي .. عزوز !

فديت قلوبهم .. كلّي

وبعد وصالهم .. من لي !؟

يابوكم

خلكم سنعيـن

بلاش إزعاج

بلاش النوم متأخر

في بُعدي

خلّكم حلويـن

مثل منتو هنا عندي

أبي هالناس تمدحكم

برقتكم .. وطيبتكم

أبي هالناس .. تجي تسأل !

وش تسوّي يابومشعل

إذا غابوا ؟

إذا غبتوا !

أحس الكون ذا خالي

من احساس الفرح

والشوق متعالي

لبسمة واحدٍ فيكـم

لقلبٍ بات بيديكـم

لحضن أشتاق له

لا جيت من شغلي

ينسّيني عنى يومي

ويبعد عنّي همومي

حضنكم .. إيـه يا عيالي

فقدته

لا .. بقى مـرّه أخيـره !

قبل ما ترحلون هنـاك

من دونـي !

وأمانه

لا رحلتوا

وصرتوا هناك .. من بَعـدي

يابوكم

خلكم سنعيـن

بلاش إزعاج

بلاش النوم متأخر

في بُعدي

خلّكم حلويـن

مثل منتو هنا عندي

أبي هالناس تمدحكم

برقتكم .. وطيبتكم

أبي هالناس .. تجي تسأل !

كيف تعيش يابومشعل

إذا غابوا ؟

[بسـام بن عبدالعزيـز]

وجاء ردّ الوفاء كالآتـي

~ ~ ~

لا مايروح ..

اللي في قلبك سكن .. !

تسكنه .. حب و حنان ..

ويسكنك .. أرض .. و وطـن .. !

.
.

دام هم عاشوا لعـينك ..

دام هم أحلى سنينك ..

لاتفكر .. لحظه وحــدهـ .. !

بأنهـم .. غابـوا .. أبــد !!

أدري هُم راحـوا ولكـن .. !

بس .. راحــوا .. بالجسـد .. !

يعني ..

هم لسّه .. معاك ..

أرواح ..

تحياها .. سمـاك .. !

لا تخلّي .. البعد ..

يفرح .. !!

وأنت تبكي .. غيابهم ..

هو صحيح .. الفقد

يجرح ..

لكن انت .. أقوى بهم .. !

.
.

غلا ..

مشعل ..

وآخركم .. يجي عزوز .. !

أمـانه ..

أسمعـوا .. بابا .. صحيح .. !

أمـانه ..

خلّوا .. بـابـا .. يستريح .. !

.
.



يعني ..

خلّكم سنعين ..

بلاش أزعاج

بلاش النوم متأخر

في بُعدهـ

خلّكم حلوين !

مثل ماأنتوا هنا عنـدهـ ..

.

وصدقني ..

أكيـد الناس .. بتمدحهم ..

بطيبتهم .. ورقتهم .. !

وعشان اللي يجي يسأل .. !

وش تسوي يابومشعل .. !

إذا غابـوا .. !

ترفع راسـك .. وتذكر ..

بأن الله عطاك .. أجمل ..

ثلاث قلوب .. في حضنـك ..

ولاتــزعل .. !!!

ولاتــزعل .. !!!

ولاتــزعل .. !!!




.
.

عُذراً .. بسام ..

وعُذراً .. لمن سيكون هُنا .. !

[بسـام بن عبدالعزيـز]

صباحي أمس

يا ضيقـه !!

بداني هَـم

بداني لا أمل

لا نور

بداني حزن !

وكن الدمع في عيني

نوى للرمش تغريقـه !

صحيت أبكي !

صحيت أشكي

صحيت أفقد

من احساسي الكثير

وبس أملك

تأنيب الضمير

وألم .. يا ناس ماطيقـه !!

[بسـام بن عبدالعزيـز]

ياخي بس

ياخي اسكت

والله إنك مشكلـه !

.

ياخي عـيـــش

تكفـا عـيـــــش

ولا تكثّــر اسئلــه !

.

كل شخص

وله ظروف

وله هموم

وله ألـم !

وله تعاسه

وإنتكاسه

وإنظلم !

.

ياخي .. بس مرّه أبي تسأل سؤال

وخل نفسك .. بالعقل .. تلقى إجابـه

كم حولك بالبشر .. ماهو بـ حال ؟

كل ما شاف الأمل .. همّه سرى بـه

كل ما حظه .. بعد عنّه ومـال

وإن بدا يصرخ .. محد حوله درا بـه

لا تمنّى .. إنتثر دمعه وسال

يدري .. إنه عاجز .. وحلمه نهابـه

وفوق هذا يبتسم .. طول الليال

وطول ماهو بالبشر عايش نِصابـه

يفرح ويبني الأمل .. فوق الخيال

ووسط لحظات الحزن ينسى عذابـه

هذا .. ما يترك فراغ ولا مجال

للهموم .. اللي تبي تاخذ شبابـه !

.

وإنت .. وش يفرقـك عنـه ؟؟

لا تقولّي

هو أكبر .. هو أقوى !

القوي الله

وربّي .. مدّنـا بـ عقـول !

أجل وشلون نتميّـز

إذا كان العقـل .. زينـه !

وبس نستخدمه

في

ليش ؟

وأنا تعبان ؟

أنا مليت ؟

أروح لمين ؟

يا هاجرني ؟

بلاش تغيب ؟

محد حولي يحس فيني ؟

.

ما يحتاج

جميع الناس

تدري عن همومك !!

ياخي عـيـــش

طلبتك عـيـــش !

إترك هالكلام

وعيـش

إترك هالهموم

وعيـش

إترك .. هدمك لنفسك

إترك .. عَجزك القاتـل

إتركها ظنونك يـا ضعيـف وعيـش


أبيك تعـيييييييييييش !

.
.
.