سبحن مغطش ليلها(طرق مسحوب مهمل)

[عبدالله النعيمي]

سبحان مغطش ليلها عن ضحاها
واللي دفع من جوفها عذب ماها
الواحد المعبود جل وتعالى
رازق طيورن سابحة في سماها
بسم الله الخلاق نبدا القصيدة
عساه يصخر قصدها ومعناها
قال اللذي ذاره من الهم ذاير
نفسي تحس العوق باقصى عضاها
واسباب مابي خافين في ضميري
ومشكاي لله من جروحي واذاها
ما يشكو المومن لغيره وحسبه
شكواه للي خلقته هو بداها
من طين صورها و ثمن امرها
للخير تتبع والشرور تعداها
لكن نفس المودمي ما تطاوع
في غبة الشهوات يطبع رجاها
تنهل من العصيان في كل رغبة
من عقب وطر الحال تنشد وراها
هيهات ماتدري بما هو مقدر
بتذوق عقب السام حسرة قضاها
الايام تترى والزمن يقرض العمر
والنفس في غفلات عن ما ولاها
تشدي لباذر صابه الودق وانبت
عشوب يمحل قيضها ما علاها
ولا سحابة وسط الافاق بانت
ثم الشمالي كزها عن فضاها
اشوف وقتي عامرن بالمصايب
تبرح مصيبة وضعفها في قفاها
يارب يارب السما يا الهي
تفرج همومن ما نرى منتهاها
تعلم بها ياربنا وانت تدري
وتغفر زلل نفسن طمعها عماها
تضفي من الايمان حلة علينا
وتسبغ على الارواح نعمة هداها
يامنزل الانعام وهود وتبارك
ياوالي الكعبة وحامي صفاها
يا مقدر الارزاق بين الخلايق
كلن يحصل قسمته ما عداها
يامرسي الاوتاد فوق الصفايح
عن لا تميد وترجف اللي وطاها
والختم صلى الله تعالى وسلم
على رسول الانس والجن طه
محمد المبعوث من نسل هاشم
خيرة نسل عدنان علية ملاها
بعد ذرات الحفايد بالاطعاس
واعداد ما الارياح تسفي ذراها

نظم / عبدالله المهنا النعيمي

[قديم الشوق]

مشرفنا وشاعرنا / عبدالله النعيمي

صح لسانك وأنا أخوك

رااائعة من رواائعك

قصيدة باذخة جمالاً ومليئة شعرا ً في كل بيت من أبياتها

الله يعطيك الف عافية

وتقبل فاائق تقديري واحترامي

[عبدالله النعيمي]

صح الله بدنك اخي قديم الشوق واعلا شانك. اسعدني مرورك وعطر متصفحي تواجدك.

[سحابة عطر]

مشرفنا عبدالله النعيمي
ابدعت في قصيدتك
ماشاء الله تبارك الله
اسلوب وكلمات لولااروع
تسلم الايادي اللي كتبت

[شاعر بلا قيود]

والله مانت هين يابو مهنا



صح لسانك

[عبدالله النعيمي]

صحت ابدانكم جميع بلا استثناء , لكم ودي واحترامي

عبدالله