السامر .. شاعر آل سعود .. سمو الأمير عبدالعزيز بن سعود بن محمد آل سعود طرح مسابقة لمن يكمل ابياته الثلاثة بمناسبة مرور خمسين عاماً على تولي صاحب السمو الملكي الأمير سلمان بن عبدالعزيز لإمارة الرياض .. حباً في أميرنا المحبوب أمير الرياض كانت مشاركتي في مسابقة الشاعر المبدع " السامر " .
(عـز الــرياض وعـز وادي حـــنيفه=وعـز الامـاره والامور العظـايم
عدل الحـكم ســلمان بالعـز ريفــه=خمسين عـام ٍ كـل ابـوها غــنايم
تبصــر بعــدله عـين حـي ٍ كفــيفه=المجــد له والطـيب والعز دايـم)
نجد العذية تحت ظله مريفة= رقابها للمجد راعي العزايم
رقابها فوق الجبال المنيفة = طير السعد في جوها دوم حايم
يحبها حب الوليف الوليفه= ونجدٍ واهلها تعشقه عشق هايم
خمسين عام ونجد تمشي بكيفه= تمشي بكيف اللي سيوفه صرايم
عدل الحكم راعي اليدين النظيفة = ميــزان عدله دايم الـدوم قايــم
اختاره الحاكم علينا خليفة = خمسين عام الحكم فيها سلايم
يعطف على راعي اليدين الكسيفه= ويرعى الأرامل والعيال اليتايم
ويضرب بحزم اهل العقول المحيفة= والـدار طهـرها بليـا جرايــم
من خالف المنهج يجزه بسيفه= حكم الشريعة مارضى بالثلايم
الله يديم اللي عروقه شريفه = شهم الرجال اللي سلالة شهايم
آل السعود أهل النفوس العفيفة = هم درعنا لاجا نهار اللزايم
وتبقى الرياض بفضل ربي مريفة= في ظل سلمان الكرم والكرايم