[هواجيس سارة]

محتاجتك

قبل الموادع قبل موت الأحاسيس= قبل الرحيل وقبل طول المسافه
قبل البعاد وقبل تنسى (( هواجيس ))= قبل الجروح وقبل ويل الحسافه
ارجوك تذكر ربك وتلعن ابليس= ماعاد أنا حمل الألم والكلافه
محتاجتك حاجة يدين المفاليس= للمال في وجه الزمن واختلافه
يرضيك أعاني طول ليل الكوابيس؟= يرضيك أعاني صبح عمري وأخافه؟
الحزن ضيفي والطواري جواسيس= والدمع عيني ذنبها باقترافه
البارحه قلبي هلاهل معاريس= واليوم قلبي للحسايف زفافه
من بعد حب ٍ ما تشيلَ القواميس= أصبح شعورك زايدٍ في جفافه
تعال واقرا ما انكتب بالكراريس= فيك انت شعري زان طرقه وقافه
دونت انا قافي من أقصى الأحاسيس = ما هو عبط قلته ولا هو سخافه
الشعر في قلبي هموم وهواجيس = ما هو هدف شهرة وحب الصحافه

اختكم
هواجيس سارة