عطني سيجاره خلني اشعل الليل
وانفث به الدخان واشب ناره
فالحيل ماعاده على خبرك الحيل
والشيب غازي الراس معلن وقاره
قلت اتمشى بالقوافي مع سهيل
واسامره وان حب ياخذ سيجاره
وابعدت عني دلتي والفناجيل
من بعد ما زاور خيالي خماره
وقمت ازود حالي القول واطيل
واخبره عن نجم السما في مداره
واتلي هجيني الشعر له بالمواويل
حتى بضيه زاد واعطى الاشاره
حتى علينا الريح جات بالغرابيل
وضيعت فيها من يمينه يساره
ميل معي لكن على عكس ما اميل
يقول صعب انه يواصل مساره
ياشينها افكاري وبعض التعاليل
خلطت فيها رمل باقسى الحجاره
ولبست طوق النار احسبه الاكليل
اثري غشيم اقولها عن جداره
هات السيجاره ياولد واشعل الليل
وبراد شاهي كيف راسي وعماره