ان ماقطعت الدرب من بعد تفكير = ابقطعه وان طوقتني الجهاله
وابشر ولايهمك واذا بعكس السير = القطب الجنوبي والشمالي قباله
من وين ماوجّه كسبت التباشير = قطب الشعر شعري وفكري خياله
مدري وش اللي قدرته المقادير = لكن على الله كل صعبٍ سهاله
الطيب مايصلح على نافخ الكير = والصبر لايمكن يجاهد إلحاله
حنا عرب غيّره وعبره وتذكير = ماهمنا غزو الفضا والحثاله
للكايده قلنا عسى خير ياطير = نسقي العطش دم الفخر والشكاله
نخوه وفزعه مانعد المخاسير = واللي زبنا يبشر بماقد غدى له
دم العرب يجري من القلب للغير = انموت مانرضى بدمٍ بداله
قد خصنا الله بامر حكمه وتدبير = جُند وعبيد وعز دين وعداله
ياما رفعنا راية العز والخير = واكبر دليل المصطفى والرساله
سلم على سات العرب والمزامير = وقله يغني كيف ماهو بداله
اليا متى والسر في جمة البير = ياحيف ياوقت الخنا والعماله
نبقى عرب واللي يبي يصير بيصير = حتييش ياغزو الفضا والحثاله