[قديم الشوق]

( المجد عوفي إذ عوفيت والكرم
.................... وزال عنك إلى أعدائك الألم )




هذه القصيدة نضمتها قبل فترة ليست بالقصيرة

بعد أن تماثل صاحب السمو الملكي الأمير / سلطان بن عبدالعزيز _ حفظه الله _

للشفاء إثر العارض الصحي الذي ألم بسموه الكريم

فالحمدلله على كل حال ..

وقد نضمت هذه القصيدة لتعبر عما أكنه ويكنه أبناء هذا الوطن الشامخ

لسموه الكريم من حب وولاء وتقدير ..

وإليكم القصيدة وماحملته من مشاعر :




للمجد سيف وللمواقـف رجاجيل
.................. يوم المواقــف مالها غـير رجال

وشلون يافخر القـروم الحلاحيل
.................. ماينشغل لك ياذرا هالوطن بال

مابين تكبير ٍ ومابين تهليل
.................. ضج المكان ولج يوم المرض زال

كم دعـوة ٍ وصلتك مع تالي الليل
.................. من شايب ٍ ذاق العنا وـقلة الحال

ومن عجوز ٍ شافـت الهم والويل
.................. لاعـندها مال ٍ ولاعندها عيال

أغـثتهم ياوافي الميح والكيل
.................. ولا غدا للفـقـر ملفى ومقيال

كنك تشوف اهـل العوز بالدرابيل
.................. ياواحد ٍ مداته جزال وعجال

منّـا الى مكة الى القـدس واربيل
.................. الى غروزني وكابل وحدّ نيبال

كل ٍ رفع كفه ودمعه هماليل
.................. شيبان ٍ ونسوان وعيال واطفال

يدعون لك في المقـفـية والمقابيل
.................. ان الله يحفـظك على كل الاحوال

خيرك على هالناس ماله تماثيل
.................. عمّ المدن واهـل القـرى واشهب اللال

هذا كريم وذاك منان وبخيل
.................. كل ٍ شبع من خيرك وطاله ونال

عـطيتهم من دون صاع ومكاييل
.................. تعطي عـطا اللي ماخشى قـلة المال

وصلت ياريف اليتامى مواصيل
.................. ماقد وصلها ماضي الوقـت رجال

ما اقول انا انك في العطا كنك السيل
.................. السيل كنّه مع عـطا كفـك ريال

القـول قولك يوم تكثر الاقاويل
.................. والفعل اهـو فعلك الى قـلـّت افعال

انا اشهد انك يالوفي شيخ ٍ مهيل
.................. وانك حبال اللي تهاوت به حبال

انت الفخر والمجد والخير والخيل
.................. ياسايق ٍ كـف العطا يْمين وشمال

لاقـمت قام لقـومتك كل هالجيل
.................. والى قعدت وملت كل ٍ معك مال

عزّيت ياراس الرجال المشاكيل
.................. من كنت له عـمّ ٍ ومن كنت له خال

حظ العرب بك حظ من حدّه السيل
.................. في ليلة ٍ ظلما ولاحوله ازوال

ساقه على حتفه اهو والمعاميل
.................. وربك كريم وفرّج الكرب بالحال

ردّه عن دروب الفنا والتهاويل
.................. وحدّه وهـو في غمرة الموت للجال

واخوانك سيوف الزمان المصاقيل
.................. اللي لهم في العز مارد ومدهال

( انتوا هـل العوجا ولا به مجاهـيل
.................. شرب المصايب عندكم شرب فنجال )

لاروّحت خيل الضلالة مشاميل
.................. أفعالكم يشهد بها كل رجال

دام انت طيّب ماعلينا من الميل
.................. ولا علينا من صواديف الاهـوال

دام انت طيّب فالمعزّة فـناجيل
.................. ومداتك الجزلة يا ابو خالد دلال

دام انت طيّب فالفخر للقـناديل
.................. لامن تجلــّت واهتدى بنورها ضال

دام انت طيّب وش عـلينا من سهيل
.................. والخير باذن الله على كفـك يشال

كم شلت حمل ٍ ياذرا العز ماشيل
.................. وتشيل ياسلطان بعزومك جبال

ناخت ذلول العز حشمة وتبجيل
.................. لك يافخرها ثم صارت لك ظلال

وللمجد سيف وللكرم حِـيل ونخيل
.................. واعتى المواقـف مالها غير رجال




قديم الشوق