[شيهانة]

إي بالله اخطوا والخطا اللي جابهم عين الصواب
مبطي وانا الشوف الطمع يكشف رداهم واستره

مايملي عيون الحسود بهالزمن غير التراب
ومن لا يتوب من الخطا تحرم عليه المعذره

اللي من اولها خراب اكيد تاليها خراب
والبندق اللي ما تثور في هدفها تذعره

ودك اليامن جاتك الغلطه من الناس القراب
الصاحب اللي ما كسبت محبته ما تخســره

مشكلتي إني ما عرفت احسب لصدتهم حساب
قلطتهم صدري على ذكرى قصيد وحنجــــره

صوتِ يصول بمنبره واخطاب ما مثله خطاب
والطيبه اللي زعزعت صوت الخطيب ومنبـره

ما فيه دمعِ صوبوه احبابي بوجهي وخاب
ولا زرق حزني على غالي ولا فج انحره

كل الزهاب الي معي ذكرى من اصحاب الزهاب
واللي بقالي من عذاب اشرس طريقي واخطــــره

لأني تجنبت الغرق.. عديت من فوق السحــــــاب
لأن اكثر اصحابي ورق.. ما شفت للطيب إثمره

والله ما حطيت بين الحقد ...والخوه حجــــاب
حتى غدوا ربعي يحدوني على الضيق اشكره

البارحه ثارت علي رقاب وآوتني رقاب
البارحه يا ثقل دم البارح ويا مــــــحقره

أثر المصايب ما تجيك إلا من الناس القراب
وبهالزمن حتى الخوي اللي تثق فيه احــذره!

إهب يا وجه الحسد وشلون جمعهم وغاب
كيف السنين اللي عطتني بعثرتهم بعثــره

لا بارك الله في رفيقِ تزعله كلمة عتاب
ولا جمع الله الرجال اللي تفرقهم مـــــره

الصاحب اللي ما يجي من صحبته غير العذاب
نذرِ علي إن ما هجرني وإلا انا ب اهـــــــجره

من يفتح لفرقاي باب افك له عشرين باب
وإذا خويي ما يقدر خوتي ما اقــــــــــدره

عودت نفسي كل ما شددت لليمه ركـــــــــاب
ما أصد وجهي عن طموح إلا لياجبت خبره

إن روحوا فانا بري منهم ليوم الحســــــاب
وإن جرحوا قولوا لهم ما حركوا فيَ إشعره

شفهم لهم حول السنه ولا خذوا مني جواب
احسن دوا للي يحاول يستفزك تحقـــــــره

ما كنت احاتيهم صغيَير عاد احاتيهم شبــــــاب
الصاحب اللي ما ذخرني لليوم الاسود ما اذخره

شفني جمعت اوراقهم بكتاب واغلقت الكتاب
يا وقت لم اللي تلمه وانثر اللي تنثــــــــــــره

اللي يخاف من الظما يترك لنا طرد السراب
واللي ماهو بقد الظلام ووحشته لا يسهــــره

عقب إكتئاب البارحه ما عاد انا حمل إكتئاب
الطيب جرجرني وانا ماني بناقص جرجره

انا تجرعت الظما لين احترق وجهي وذاب
انا كسرت بخاطري قبل الصداقه تكســـره

انا خسرت اللي غيابه غير عن كل الغياب
انا غفرت لعالمِ ما تستحق المغفـــــــــــــره

انا اكثر (إنسان) تعلم من كثر ما اخطأ وصاب
انا آخر (لسان) يتكلم في زمان الثرثـــــــــــره

انا القصيد اللي نزع من دفتره مليون ناب
وانا الوحيد اللي جمع مليون ناب بدفتـــره

جفني وجرحه السهر , حيلي وهدته الصعـــــــــاب
دمعي هجر, ضحكي ندر, عمري وضيعت اكثره

شيبت بعقول العرب ...هيبت روسِ ما تهاب
جمهرت ناسِ عمرهم ما يعرفون الجمهــــــره

ما صرت ذيب إلا لأن اللي تحدوني ذياب
ما كنت اغيب إلا لان العفو عند المـــقدره

ترى حلاتك لا حملت لصاحبك كلمة عتاب
إن ما نطقت بها بوجهه ما تذمه بظهــــــره

في هالزمن ما يملي عيون الحسود إلا التراب
وإلا الحظيظ...الطلقه اللي ما تصيبه تذعـره

ودك اليامن جاتك الغلطه من الناس القراب
الصاحب اللي ما كسبت محبته ما تخسـره