حسبت الجرح تبريه الليالي=و اثاري الجرح عيا لا يطيبي
و عاد الليل من أول و تالي=يذكرني بجرحي من حبيبي
ألا يا ليل تكفى ارفق بحالي=كفى في دنيتي عايش غريبي
جفوني هُم و انا ازيد بوصالي=و دمع العين همال ٍ سكيبي
تباعدنا و لا ادري وش جرالي=و عيا ذكرهم عني يغيبي
يمر الوقت و الذكرى فبالي=و ذاك الطيف من قلبي قريبي
أيا منهو يجاوب عن سؤالي=و يطْفي النار و اسباب اللهيبي
حبايب مرُّهم يا كيف حالي=و ليه الجرح عيا لا يطيبي
أيامن طيفها يراود خيالي=ترى فقر الحبايب ما يعيبي
و عابك يوم شديتي الرحالي=و غبتي مثلما شمس المغيبي
إذا بعتي تراني ما أبالي=و لا بتحسَّر و شعري يشيبي
أنا يا بنت فوق الهام عالي=و يسعدني إذا ظنك يخيبي