[مليح الرويلي]

أعظم عيوبي إني إنسان حساس=وأطهر ذنوبي حب كل المخاليق
ولدت من رحم القراده والاتعاس=وعلى جبيني بصمة الهم والضيق
فيني علو كليب وإقدام جساس=وفيني كرم حاتم وحسن المناطيق
وأحيان أجي حطاب وتعاند الفاس=وألقى محاريها بجوف المعاليق
لقيت لي مهره وأنا كنت فراس=وكنت أتجول بين غرب(ن) وتشريق
عسفتها وصرت أتوجس للاوناس=ومسكت يدها بين نشوة وتعريق
منها أنتشيت وشفت حظي علي الناس=يومي ملكت أم الخدود المواريق
بنت درج حبي وأنا كنت محتاس=وشالت هموم(ن) كانت تشيب طويق
لكن قدرنا نوب بيدين وسواس=يسعى يبي تخريب تدمير تضييق
وحنا سمحنا له يجي وسط الانفاس=وأكثر أحيانه بس بوجيهنا يويق
أحسن لنا ياسيدة عقد الالماس=نفهم بعضنا ونحتسي حالي الريق
ونبني سعادتنا قبل دق الاجراس=أجراس شيطان(ن) يحب التفاريق
صحيح أحبك ماهي حروف قرطاس=وعندي على ماآقول عهد(ن) وتوثيق
لكن عيوبي أني أنسان حساس=وأصدق ذنوبي حسن ظن المخاليق