[سلوة الخاطر]

:D



هذا حال الخروف الليلة:o


بالنسبة لـ الأسئلة


*// عاااد الله لايهينكم نبي منكم .. نأخذ أحد الموااقف اللي صاارت لكـم ,, أو اللي صارت

للعاائلة مع الخروف .ولو سمحتوا لحد يجي يقول لي مافيه ترى بنذبحه?? .


ونحن صغار اذكر اشترى الوالد الخروف وحمله بالبيكب من ورا وركبنا انا واخواني
من قدام وقال: عيونكم عليه
ماصدقنا كلنا لافين رؤسنا نطالعه ونمسك الحبل المربوط فيه من الشباك
شوي ولا يختفي:D
أنا مالي خص مجرد فكرة مرت برأسي انا واخوي
بصمت بس فكينا الحبل :D
نط من السيارة صارخنا الخروف شرد ضرب الوالد هرن وبيرك شوي وإلا الهرنات
تصارخ بالشارع خاف المسكين يركض شرق غرب شوي وتمر عليه سيارة مسرعة
واردته قتيلا وصار ضحية السياقة المتهورة بدل ما يكون ضحية العيد

الاحلى رجعنا نشتري واحد ثاني

تخيلوا ابوي هالمرة ما قال حطوا عينكم عليه:D :D


*// وفيه سؤال يؤرق مضعجي ويجول بخاطري ع الدوااام .. هل قد شفتواا ذبيحة وهي تموت

قدام ناااظريك .. وتلفظ انفااسها الاخيرره ..؟؟ ..


نعم وكانت متعة احرص عليها


*// واذا كنت رجال هل قد ذبحت الذبيحة.. وكم مررة ..??

ومن اللي يذبحها معك يعني احد يساعدك .. وايش هو احساسك لما تجي

تذبحها <- لاتضحكون على اسئلتي رجااء ..؟




*// واذا كنتي بنت هل قد قطعتي الذبيحة وسلختيهاا .. وهل عندك استعدااد لانكـ تسوين

هالشي والا فاشلة بالحياة وماعندك، ماعند جدتي <- اسمع من يتكلم بس..




لا ماذبحت حتى الان ونفسي اجرب:p

أنا بس خبرة في التقطيع والتوزيع في الاكياس السوداء:D



*// هل فطوركم بالعيد يكون من الاضحية والا تسيف وقلوا لنا وشو الله لايهينكـم .!!


لا
فطونا يكون معد قبل الذبح:)


*// وش أكثر شي يهمك بالعيد .. لما تصحى .. واكثر تحرص عليه..!؟؟


صلاة العيد ثم الذبح ثم انتظار العيدية


*// شي بتفقده بهالعيد هالسنة ..!!??


الذبح لانا كبرنا على منظر الدم


*// هل أنت من محبين اللحوم .. !وايش الوجبة اللي تحرص على تناولها بالعيد ..اللي تكون

مصنوعة من نفس الذبيحة .؟!!.<- حلوة كلمة "مصنوعة" احسها لعبة ههههههههههه


لا لست من محبي اللحوم
إلا اذا كان تويس صغير جدا
ويكون قوزي مشوي في الايام العادية:D

بس في العيد الاضحى
احب شوي اهل العين
وهو شوي اللحم بطريقة لفه بعد تتبيلة بالبهار والهيل والزعفران
وانواع من الاعشاب العطرية في خصف مصنوع من سعف النخل ويخاط عليه ثم
يوضع في التنور المتاجج بالجمر على صخر صلد ثم يغطى التنوربالطين بالكامل الافتحة صغيرة
ويترك لفترة النضج ويكون معد له رز ابيض مشخول سلطة روب مع بصل محموس
في الدهن البلدي مع فلفل اسود يسمي ( شياط )




*// واذا قد احد منكم راح للحج مررة .. ياليت يحكي لنا مواقف قد صاارت له .. ??


قبل 3 سنوات عند مدخل جسر الجمرات في يوم 12 من ذي الحجة

(( سقط مجموعة من الناس أمامنا و حصلت بينهم وفيات و لم نستطع حتى الوقوف لإنقاذهم بـ سبب الزحام الهائل))حسب ما قال أخوي الدباسي

اعتقد كنت في نفس المكان و لا كنت ضايعة بعد
الي صار ان دخل فوج من الحجاج المستفرين الغاضبين على الشيطان
وفرقوا بين مجموعتنا:(
و لاني كنت متفقة على ان تكون اشارة العودة
لافته رمي الجمرات الصفراء:D
ولكم تخيل حالتي عندما وجدت عدد لا يحصى
من الافتات الصفراء

يووه ما خليت عسكري ذلك اليوم ما طلع المنديل في الي جيبه

بس ما قصروا بالصدق يعطيهم العافية :)

موقف لا يُنسى


//*وايش الا شيااء اللي افتقدها بمكة .. والاشياء الروحانية اللي شعرت فيها ومالقيتها بأي مكاان اخر..؟؟


الروحانية وانك بالفعل بالقرب من الله والاستبشار بالخير
بالالفة بين فوج انت تعرفهم لاول مرة ويصبحون أهل:)


//*من اول عضو ودك تهنيه بالعيد ..؟؟

الجميع :D


//*من اول شخص في البيت تحب تهنيه ..؟


كلهم:D


//*وشوو برنامجك داايما بالعيد الاضحى..؟


من الاسرار العائلية
أخاف من الباباراتزي:p


//*وش نوع الملابس اللي تحب تلبسها يوم العيد..؟؟

امممممممممممم
طبعا بعد ساعات من التردد ألبس العباية
والشيلة فوق ثياب العيد التي تختلف حسب الموضة
بس المهم تكون جديدة
لان معظم الاهل الي يجون يسلمون
رجال



لون الثلج

كل عام وانت بخير
ولا خلينا من روحك الحلوة

ولك خالص الود والورد

وهذة لقلبك الطيب


وهذة لك وللجميع