مرحبا بالجميع
الحقيقة حايرة ماشاء الله عليها جت على الجرح وهم مستمر في عالمنا العربي اللي مو ناقص هموم والخليجي خصوصاً.
السرعة وأسبابها وعلاجها.
أولا نشوف من يسوق السيارات عندنا صنفين شباب مراهق ، مطفوق ، وعمالة سايبة ماساقت في ديرتها وتعلموا عندنا ومعهم رخص بعد من مدارسنا اللي ماشاء الله قمة في التشدد في منح الرخص الله يخلف بس (تجربة مع سواقي اللي خذا الرخصة بدون فحص حقيقي) :p
ثانيا قوانين المرور اللي عفا عليها الزمن والواسطات اللي شغالة أجل معقولة طفل مايتحاوز عمره 11 سنة يسوق صالون جمس وفي شوارع عامة أو حتى داخل الحارات؟؟
وين النظام الا وين أبوه؟؟؟
تعرف والله من كثر ما أشوفهم خصوصا في حارتنا الهادئة جدا (في نيويورك) ;) تشوف راس الطفل وكنه يطل من دريشة علشان يشوف طريقه ولا من زود القهر يطالع فيك وهو يضحك ويقول عندك شي؟؟ 
من ناحيتي لو الأمر بيدي أول شيء أسويه أمنع العمالة مهما كانت من القيادة وتملك سيارات ونسوي مثل الكويت إللي حصرتهم في أهل المهن الخاصة مثل الأطباء والمهندسين وغيرهم من المناصب المهمة ، أجل في شوارعنا في الرياض تلاقي العمالة متزاحمين في سيارة بوكس (صالون) سدرك والا كراسيدا وفوق التنده عدة سباكة أو كهرباء والسيارة على فكرة متعاونين في قيمتها ويتوارثونها :p .
ثانيا الطفل أو المراهق اللي يمسكه المرور وهو يسوق يمحطون به في السجن ومعه أبوه حتى يعرف إن الله حق وماعاد يسلمه مفاتيح الدتسن والا الهايلوكس والا حتى الشبح وتكون الغرامة هنا مضاعفة ولايفكونه إلا لين يسدد كل المخالفات .
من تجاربي الشخصية مع السرعة ولاتضحكون علي (تقولون قاعد ينصح الناس وهو داعس على الطريق وماشي الطبلون) ;)
كنت مسافر للشرقية وسرحت بيني وبينكم مع الإذاعة والأغاني (قيس) وأثاري سيارة الدوريات متوزية تحت طعس وماشفتها ، المهم وصلت لنقطة التفتيش ألا الجندي يقول الله لايهينك رخصتك وإستمارتك وإصفط على جنب ، قلت خير وش السالفة ؟؟ قال مسرع وتجاوزت الحد المسموح به، طبعا الرادار صايدك وهو صادق ولو تحلف لهم من هنا لبكرة ماصدقوك، قلنا نختصرها ونلبق رحنا لجندي ثاني قاعد في جيب ويسجل المخالفات ، لما وصلني الدور (قبلي ضحايا كثار) سألته بالله عليك كم كانت سرعتي؟؟
قال إنت صاحب السيارة ال000 ؟ قلت نعم قال سرعتك 135 كلم وأثنا الحديث ألا الدورية اللي متوزية تبلغ عن سيارة ثانية تخليو كم كانت سرعتها؟؟؟؟ 207 كلم نعم 207 هنا قلت لنفسي إذا أنا 135 وكفشوني ومحطوني بمخالفة أجل هذا اللي طاير وش بيسوون فيه؟؟؟ 
.
عموما مشكلة السرعة تبغى حل جذري من جهات عديدة أولها المرور وأنظمته القديمة وثانيا توعية شاملة وعقوبات صارمة ، تكثيف البرامج والمحاضرات في المدارس خصوصا المتوسط والثانوي لأنهم بيني وبينكم يجون بسيارات كشخة والمدرسين حده كامري والا لومينا ويمكن ونيت غمارتين :p .
عموما عزيزتي حايرة كثر الله خيرك وماقصرتي في طرح هالموضوع الهام لأنه بكل أمانة مسبب مآسي لبيوت وعوايل كثيرة ونسأل الله أن يجنبنا وإياكم كل مكروه وأن يهدينا ويهدي هالمهبل اللي يصفط الطبلون على الدائري.
تقبلوا كل محبتي وتقديري.
المحب:جدووووووووو