ياهاتفي حرّمت أنا بعض الارقام=ما أدقها في شاشتك للقيامه
أرقام ناسٍ قدرها تحت الارقام=ما أظن يلحقني وراها ملامه
أحكم عليها فالغلا حكم الاعدام=من شان كلٍ يتضح له مقامه
والا انت ياللي صار لك عدة أيام=أشوف في عينك دموع وندامه
خلك على هرج القفا تبني أحلام=لاخير فاللي ماينفذ كلامه
غرّوك ناسٍ حكيهم دوم هدّام=أهل القلوب السود وأهل النمامه
خلّوك تنسى صاحبك يا بن الاكرام= عقب ثلاث سنين تنسى غرامه
خليتني عايش على هم وأوهام=وحرمت جفني من لذايذ منامه
طاوعت فيني هرج عاذل ونمام=واليوم أشوفك تايهٍ فالغمامه
لاشفتني صديت مع مر الايام=لاتقول قلبك يافهد وش علامه
اليوم قلبي مات ياترف الاقدام=موت القلوب ولاتموت الكرامه
خلاص قدرك طاح من عيني العام=رميت قدرك مثل رمي العمامه
مابي تراضيني والايام قدام=وآخر كلام أقول : مع السلامه