تذكر حبيبي شعورك يوم عشنا البعاد=كانت رجاويك تسبق مطلبك يا بعدي
ويوم جالك وصالي .. صار قلبك جماد=وانهيت قصة هوانا قبل لا تبتدي
في ذمتك كانت اقوالك حبيبي وكاد=وكان فعلا شعورك ثابت وسرمدي
اليوم بان المخبا وانكشف هالوداد=وبان زيف المشاعر ظالم ومعتدي!
ما قلت بتخلي اكفوفك لجرحي ضماد=واتخلي الناس فينا تتبع وتقتدي
وقلت بتخلي أحضانك وصدرك مهاد=لا صار ما صار .. بتقدم حياتك فدي
خطاك توعد ولا توفي عهود ومعاد=خطاك تمشي بدرب اعوج ودربي قدي
تنام عينك .. وانا عيني جفاها الرقاد=اشحبت خدي وناظر كيف خدك ندي
تبعدني عنك ظروفي..ليه تبعد عناد؟=اجيك خطوة رضا.. ورضاك يبعد حدي!
تدفى بناري وتتركني بقايا رماد=تلعب رياح الشتا فيني تهز جسدي
فكري بوادي .. وفكرك ياحبيبي بواد=برجك اسد مفترس.. وبرج قلبي جدي!
يعني انا وانت نتناقض ونمشي ..تضاد=ما هو كفاية نحب .. الحب حظه ردي!
وبعد حبي وطيبي ماجنيت الوداد=جنيت منك عذاب وزمهرير بيدي
تستاهل اني اشمت فيك كل العباد=حرام امدحك..واكتب فيك حرف ابجدي
من حقي ازعل.. واقلب حلو فرحك حداد=من حقي انساك لو يمطر غلاك بردي
لا قلت بنساك..صدقني انا شخص جاد=لا يغرك اني صغير السن.. اوفي وعدي
بنسى وصالك.. وبنسى جرح ادمى الفؤاد=بنسى طعونك وغدرك واثبت اني اجودي
لان: انا وانت نتاقض ونمشي تضاد=ما هو كفايه نحب.. الحب حظه ردي