[قديم الشوق]

أخواني الكرام مشرفو وأعضاء وزوار منتديات منابع الأدبية ..

السلام عليكم ورحمة الله وبركاته

في البداية أحب أن أهنئكم بعيد الفطر المبارك أعاده الله علينا وعليكم

باليمن والامان والمسرات وأسأل الله تعالى أن يتقبل مني ومنكم صالح

الاعمال إنه سميع مجيب ..

ويشرفني المشاركة بهذه القصيدة التي تحكي واقع العيد في بعض

السنوات التي خلت ..

وأتمنى أن تلامس شيئاً من مشاعركم وتقبلوا خالص حبي وتقديري..




يا عيد ماعـندي كلام ٍ بقـــــوله
...........الشوق كاذب والمشاعــر دخيـــله


يا عيد أنا لي فيك ذكرى طفـوله
...........بس الزمن يا عيد ما فيه حيـــــــله


أنا ادري إن النفس ثـكلى جفوله
............العيد راح وما توا أفـراد جيـــــله


أول وانا لي فيك صوله وجوله
............واليوم مثـلك غاب واعـلـن رحيله


إلى متى والنفس فيك امهـبوله
............الحــال واني والليــالي طــــــويله


يا ليت عيد اول ّ تأخـــر أفــوله
............واقبل جريح الوقـت واروى غليله


يا زين عيد أول ّ وذكره وزوله
.............ويا زين صبـــــحه لاتجلّى وليله


ويا زين ناســه طـيبين العموله
..............أهل الوفا والدين واهل الفضيله


لاجا بشير العيد واعلن حلوله
..............تباشروا به كل أهل القبــــــيله


واجتمعوا اطفال البلد والحموله
..............كل ٍ يبي عيديته والحصــــــــيله


كل ٍ صباح العــــيد زهّب ذلوله
..............واقبل على اهل الطيب قلبه دليله


أحد ٍ خـــذا عيديته بالســــهوله
.............. واحد ٍ تباطاهم وقفـّى بخــــــــيله


اللي عطاهم ودّعوه ودعوا له
............. واللي تعـــــذر دوّروا عــن بديله


أحد ٍ كفوفه بالهدايا وصــــوله
............ واحــــد ٍ يدينــه بالعطــــايا بخيله


واحد ٍ يغـلـّـظ من ورا الباب قوله
........... واحد ٍ يوفــّي لا اقبلوا صـاع كيله


حسبي على الايام دايم عجــوله
.......... كم فرقـت ما بيـن خل وخلــــــيله


وياعيد ماعندي كــــــلام ٍ بقوله
........ الشوق كاذب والمشـــــاعر دخيله




قديم الشوق