.
.
يالله ياوالي على الخلق يالله
يامنّزل القرأن في خير تنزيل
بعشر الاواخر ليلة القدر محلاه
اللي به العتقان واجر ٍ وتهليل
نامن على اللي خالق السبع بسماه
وكم مات من جيل ٍ وافنو ورا جيل
نبدي وننهي بسمك اللي كتبناه
حق ٍ مبين امدحض اهل الاباطيل
يامرسل ٍِ من ذلل الشرك بهداه
نامن على سنة نبيّه وماقيل
ابوي مات وتبكي الناس تنعاه
كن العيون امن المطر سايّله سيل
هذا ابوي اللي بعزه ربيناه
والموت مايعرف صغير ورياجيل
فرقاه يصعب من عرف قدر فرقاه
والحيل والله ماغدابه ولاحيل
لو البكا بـِ يرجع اللي فقدناه
لخلّي الوديان يجري به السيل
لو الدهر نبكي لا ما رثيناه
فرقا ابويّه ماتبي اي تحليل
هذا ابوي اللي بخيره عرفناه
في مجلسه تنعاه حتى الفناجيل
هذا ابوي اللي رووّ من عطاياه
كل من فقير ومن يتيم ومشاكيل
هذا ابوي اللي ربينا بيمناه
واروى القرايب بالعطا والمواصيل
هذا ابوي اللي حفظنا وحفظناه
اللي يفوح بعطره البن والهيل
هذا ابوي احب رجله وماطاه
بَعده غرابيل ٍ طوّتها غرابيل
هذا ابوي اللي عشقنا وعشقناه
اللي على خيره شبعنا محاصيل
هذا ابوي ايـ خلص اللافي ان جاه
مارد خايب من لفى\ يترس الكيل
هذا ابوي اللي رحل عند مولاه
بعشر الاواخر ليلة القدر بالليل
يالله عفوك واكرمه عند مثواه
في قولك الثابت نطق ٍ وتهليل
عبدك وحج وحجج الناس وياه
عاني لك الله وسع القبر بالحيل
بعشر الاواخر ليلة القدر محلاه
اللي به العتقان واجر وتهاليل
وامن الخطايا طهره وانت ملجاه
يارب عفوك لا تجيه \الغرابيل
والنوح ما_ رد الملوّح لي ليلاه
ولا التوجد والاماني بها حيل
:
:
وختامها بسمك يالله يالله
يامنّزل القرأن في خير تنزيل
وعلى النبي صلو بعداد طرياه
اللي هدا الكفار وافنا الاباطيل
.