ليه الخطى ياقلب وانا مولّيك=ولا اهجرك من زلةٍ تعترفها
تلعب بقلب اللي من الناس تغليك=والبنت لجل رضاك باعت شرفها
مدام هذي نيّتك قبل تاتيك=مفروض غلطة عمر ماتقترفها
يوم ارتمت بنت القبايل على ايديك=في طاعتك مدري وش اللي جرفها
قالت انا احبّك واقدّرك واغليك=وهذي صغيرة سنّ وانت تعرفها
كانت من اول بس تسمع بطاريك=وأخذت كف الموجعه مع طرفها
تنوي تضيّعها وهي مانوت فيك=الين شيطانك بسحره حرفها
حتى الي من جيتها تقول لبيك=والحب لك عن كل ممشى صرفها
لولاك لا ماقالت الله يحييك=واعطتك من ريحانها من ترفها
تفرح على فرحك والي غبت تبكيك=ودموعها مافيه غيرك ذرفها
نامت على صدرك وصارت تراعيك=قطره بوسط البحر حبك غرفها ؟
تسمع وتحت الأمر مثل المماليك=مثّلت دور اللي عشق واحترفها
يوم انتهى طيشك وطابت لياليك=ماراح يوم وقصّرت في سرفها
الكذب مايبطي وبيّن مواريك=السالفه شاعت.. وكلٍ عرفها
ياوين اودّي وجهي الله يجازيك=وش ذنبها تحيا الحيا بقرفها
تكفى دخيلك كان عاده بيمديك=(احفظني من الذنب واحفظ شرفها )
علي بن مشرف