[العزوف]

باقي القمر هو القمر!!
والشمس تنشر نورها..

و أصوات تسبيح الشجر
و بر الأرض وبحورها..

وباقي الرياح و صوتها
و طيور تدَوِّر قوتها..

باقي الشوارع والزحام
و صوت المآذن ..والسلام

و باقي أطفال و مدارس..
وباقي أبوابٍ و حارس..

و باقي في ثوبي عِطِرْها
وشعره طاحت من شَعَرْها!!

ما شي تغيّر للأبد
إلا انّها ماهي معاي..
راحت و خلّتني بكَبَدْ
و ضِحكي تساوى مع بكاي!!

يا صوتها..إرحم و روح
صداك نقّضْ بي جروح
ويا ضِحكها إلحق وراها
هي بحاجتك إبقى معاها

و يا وسادتي..عذري اقبليه
ماصار لي غيرك شبيه!!
أنحت ملامح وجهي فيك
و ملح صدري يكتسيك..

كل شي..على حطة يدك
و خطّت غباري بإصبعك
مرسومه في ذاك الجدار
أمشي وأقلّد مشيتك!!
و أخاف ألمس لمستك

و للظلمه..متروكه المجالس
طاوله وكرسي وملابس
صلاة وطيور ومدارس
و نهار يلحق ليل دامس

إلا انك تركتيني وأنا..
من بعدك..أتجرع عنا..
كل شي عيّا لا يغيب..
و كلن حبيب وِيّا حبيب..

و صورتك عيت تروح
رسمتها بدَمّ الجروح

ومن بعد ما عفتي دفاي
و اخترتي دربك مع بشر
و هانت عيوني وبكاي
و صار قلبك من حجر!!

لا تسألي ويني أنا؟!
يمكن..أذَكِّرْك بْعَنا!!
و يجوز حضني ماكفاك..
و غيري يستاهل دفاك!!

بس لي طلب واحد..صغير
[محكوم]..وذا طلبي الأخير
لا طرّوا إسمي بمجلسك
خبّي عنهم ضحكتك!!

و أوعدك لو مرّ الزمان
ما عمري بأنسى انه كان
لي طفله..كانت واكبرت
ومع الزّمان تغيّرَت
ياما جدلتلها ضفاير
ياما رسمتلها بدفاتر
...ونسيت أحَفِّظها إسم
....تدَوِّره..بين المقابر!!


~العزوف~