[فواز المطيري]

عـُــزله..!!

صهيل الخيل.. جوف الليل.. مثل الضيف.. والترحيب=سوالف لييييل.. والشرهه على البرواز والصوره
مدائن عز.. منها يفزّ .. جيب ولاهو ايـّت.. جيب=تغازل لمعة عيونه.. معازيبه.. وديكوره
يفوق الفكس.. والجي اكس.. واللكزس بفزّة طيب=مثل رجـّـال من طيبه.. ينومس فعله .. وشوره
ثلاث شهور يمشي درب مايمشي دروب العيب=قلط في ديرةٍ ماهي من العربان مهجوره
ديار اللي يحبّ انه عن عيوني ..يحب يغيب=وانا ماني بمتحمل عواقب حبـّه.. وجوره
تركته ( من مشى يمشي على رمشي بلا تثريب=ولا ضيقّت له خاطر.. ولا ضيّعت دستوره
نفثت الحرف.. والكلمه.. نفثت الكذب.. والتكذيب=قريت البسمله.. وامسيت.. والاشواق محظوره
هنا.. مدري هنا.. مدري.. بدون شعور او ترتيب=نسيته بين شطرين القصيد.. ابيات مكسوره
على الله والهقاوي بين تصيب ولاّ تخيب=وانا ماخنت لو خـانه بعض اوقاته شعوره
على الله والدروب اللي تودّي اشهد انها تجيب=على الله يالغيـاب اللي يجيبه فكر دكتوره
وعليك الله ياجرحٍ عطيب.. ولا يطيب.. بطيب=تموت جروح.. ماتبرى.. وتبقى جروح مذكوره