\\
الشعِر موج ٍ عتـيٍّ والتجـارب مالهـا اعـداد
والقصايد غبة بحـور مااحـد يوصـل مداهـا
والسفينـة مالهـا الا قايـد للبـحـر معـتـاد
قايـد وربـان بحـر خبرتـه جلجـل صداهـا
ذاك ابوي القرم شيـخ الطيبيـن ونـد الانـداد
هو سبب رحلة نجاحي .. نور دنياي وضياهـا
ذاك ابوي اللي له الطولات تشهد لـه والامجـاد
و الخلايـق تقصـده لازاد فـي الدنيـا غثاهـا
عون من جا مستجير وفزعـة اللـي جـاه وراد
ونفسـه لكـل الخلايـق زايــد والله وفـاهـا
ذاك ابوي وعزوتي ..ذخري ولي عز ومسنـاد
ونفسي احسدها عليـه اليـوم يـوم الله عطاهـا
ذاك ابوي اللي بعطفه ضمني في قـرب وابعـاد
ودي احضنـه امتنـان حيثـه لنفسـي هناهـا
ذاك ابوي اللي ترفع عن تفاهات وعـن احقـاد
شامخ جلد صبـور فـي عنـا الدنيـا وبلاهـا
رجل وكفو وصيتـه عـم كـل ديـار وبـلاد
وبالذكاء نفسه تسامـت ياجعـل ربـي يحماهـا
ذاك ابوي اللي معيشني مابيـن افـراح واعيـاد
واصعب اللحظات عنـده لاكسـا بنتـه شقاهـا
ذاك ابوي اللي غمرني حـب وعطـف وتـوداد
لـه يديـن حانيـة ياجعلنـي ماافقـد عطاهـا
العطا في وسـط كفـه لويشـح الوقـت يـزداد
ونفسـه اللـي للمعالـي دايـم تسبـق خطاهـا
ذاك ابوي اللي أفاخر به مابين جمـوع وافـراد
وماحد بيلـوم بنـت يـوم تفخـر فـي ذراهـا
اشهد انه بالعطـا ضـاري ومفطـور ومعتـاد
ونفسه الذربة على الطـولات موثـوق عراهـا
العطوف ابو اليتامى والضعـوف وكـل وفّـاد
مايجيه احـد ويرحـل كـود حاجاتـه قضاهـا
الكريم ابن المكارم والكـرم مـن ورث الاجـداد
هامتـه لـولا الصـلاة وطاعـة الله ماثناهـا
والله انه صادق افعال وصمول ووافـي اوعـاد
والمجالس والنشامـا تفتخـر بـه يـوم جاهـا
يايبـه اغليـك والله والغـلا لـك دوم يــزداد
انت لي موئل وموطن والهوا وارضي وسماهـا
يايبـه والله احبـك حـب لاماهـوب معـتـاد
والحيـا نفسـي منعهـا لاتبيـن لـك غلاهـا
الرذايـل مااعرفهـا والزمـن ياابـوي جـلاد
ومنك أخذت أنا الصفات اللي لي المولى رضاها
والله انـي للتوافـه لويطـول العمـر ماانقـاد
وهامتـك ماتنتطمـن يانظـر عينـي وماهـا
شاعرة وأكتـب وحولـي مستغيضيـن وحسـاد
وغايتي هي رضاك عني ودعوتك (ربي يحماها)
يايبه بعض العواذل لارموني بحقـد وش عـاد
دام انا ذخري وفخـري روح ٍ لروحـي فداهـا
يايبه تراي بنتـك وانـت لـي عـون وإمـداد
لو يطول الوقت روحي باقية لـك فـي وفاهـا
يايبه شاني رفعتـه بـالأدب واخلاقـي الـزاد
وماكتبت اللي ينزل راسك مـن اعلـى علاهـا
يايبه شعري نظمته (دين) و(توجيه) و(ارشـاد)
والهدف من هالقصايد نصح كـل اللـي قراهـا
ياعسى ربي يسلمنا من انجـاس ومـن اوغـاد
وابقى طول العمر بنتك وانت ياغالـي غلاهـا
السهر لو رام عينـي وامتلـت ياابويـه سهـاد
فانت للاوجاع بلسـم وانـت لجروحـي دواهـا
والهنا بدفتـر حياتـي لـه مـع الايـام ميـلاد
وداخل الذكرى لك اكبر صفحـة يبـرق سناهـا
يايبه بـذرك بـذرت وللحصـاد اليـوم ميعـاد
وهذي هي بذرتك واحصد يايبه صافي عطاهـا
لاانكفت عيني عن عيونك ياابوي وصارن بعـاد
تظلم الدنيا بعينـي واحسـب ان المـوت جاهـا
ولاجمعني فيك ربـي كننـي أملـك لـي بـلاد
واشعر بإن الحيـاة اليـوم فـي قمـة رخاهـا
يايبه لاضقت مني صابني من ضيقـك اجهـاد
ودي املـي بالسعـادة دنيتـك واسقـي حياهـا
اتخذت الديـن والعلـم بحياتـي نهـج وعمـاد
وحالفه ماامشـي دروب ماتسـر اللـي مشاهـا
مـا أبـي أتيـه بالشعـر وأهيـم بشعـب وواد
وارمي بنفسـي علـى الدنيـا واحملهـا غثاهـا
يايبه روحي بقربك حققـت لـي حلـم ومـراد
واشكر الله جل شانه يومـه اللـي لـي هداهـا
فدوتك ياابوي شعري وكل باقـي لغـة الضـاد
وفدوتك نفسي وروحـي يايبـه واللـي وراهـا
وفدوتك من كان صدره ممتلي غيـض واحقـاد
جعل ربي في عيون اهل الحسد يقـذف عماهـا
وياعساك بخير يابوي وعساك بيسـر واسعـاد
وابشر ببنت على عهد الشـرف يزهـي نباهـا
الله الله الله
صح السانك ولاهنتي يالغاليه
منتازه والله يخليه لك يارب ويحفضه فالدنيا والاخره
تشرفت لمعانقت القصيده لاهنتي
التحيه والتقدير